410 kilo – tassa Kim Ujaraap rekorditaava
Kivitseriaatsimi dødløftimi naalagaaffeqatigiinnermi rekordi maanna tassaalerpoq 410 kilo.
Taanna arfininngornermi ualikkut timigissartarfimmi fitnessglimi Nuummi anguneqarpoq, tamatuma Facebookimi streamerneqarnera maannamut 24.000-riarluni isiginnaarneqareerpoq.
- Oktoberimi 401 kilomik rekordiliinerma kingorna taassuma angoriarnissaa eqqartorparput. Taamanili 410 kilo angoriassallugu eqqartulerparput, Kim Ujarak Lorentzen KNR-mut oqarpoq.
AAMMA ATUARUK Kim Ujarak Lorentzen Nuummi timersullammanngorpoq
Fitnessglimik piginnittoq aamma Kim Ujarak Lorentzenimut tapersersuisoq Allan Juhl arfininngornermi ualikkut pisumik aaqqissuussisuuvoq. Tamanna Facebookikkut streamerneqarpoq inuit katersuuteqqusaannginnerannik malittarisassat unioqqutikkumanagit.
Europami nukittunerpaat
Imaannaanngitsumik timi tamaviaarnissamut sivisuumik piareersagassaavoq 410 kilomi imaannaanngitsuuvoq.
- Oktoberimiit sungiusarnera ingerlatiinarpara decemberillu qeqqani aalajangerpugut rekordileeriarneq januarip qeqqani pissasoq, Kim Ujarak Lorentzen oqarpoq.
AAMMA ATUARUK Rekordiliisoq: Kim Ujarak Lorentzenip 401 kilo kivippaa
Rekordileeriarneq pivoq Kim Ujarak Lorentzenip nunani tamalaani malugineqarnissaa anguniarlugu, tassami nunani tamalaani nukittuneqqusaattunut qaaqqusaasalernissaq siunertaavoq.
- 410 kilop kiveriarnera ilimagisamit oqinaarneruara, Kim Ujarak Lorentzen oqarpoq.
Sungiusaasuata tuluit nunaanniit pisup streamerneqarnera siammarterpaa ataasinngornermilu ullup qeqqaanerani 24.000 sinnillit isiginnaareersimavaat.
- Neriuppugut Europe Strongest manimut qaaqqusaajumaarluta imaluunniit nukittuneqqusaannerni champions leaguemut. Isumalluavissussaguma World Strongest man peqataaffigerusussinnaavara, Kim Ujarak Lorentzen naggasiivoq.