Rekordi nutaaq: Taatsi Gabrielsenip 360 kilo kivippaa
Timersortarfissuarmi Inussivimmi arfininngornermi unnukkut kivittaarisoqarlualaavippoq.
Pokali ingerlaartoq Taatsi Gabrielsenimut tunniunneqarpoq aammalu 105 kilo ataallugu oqimaassusilinni taanna kultinnalluni.
Greenland Strongest 2021 inissinnerit
105 kilomiit oqimaannerit:
1. Kim Ujarak Lorentzen, Nuuk
2. Emil Jensen, Danmark
3. Nikolaj Joensen, Nuuk
4. Juulunnguaq Vetterlain, Ilulissat
5. Angula Ottosen, Aasiaat
6. Kristiaannguaq Lange, Ilulissat
105 kilo ataallugu oqimaassusillit:
1. Taatsi Gabrielsen, Nuuk
2. Andrei Ungureanu, Danmark
3. Nukappi Vetterlain, Nuuk
4. Jens Peter Kreutzmann, Nuuk
90 kilo ataallugu oqimaassusillit:
1. Bjørk Lange Kristensen, Nuuk
2. Pavia Nielsen, Uummannaq
3. Steffen Knulst, Uummannaq
4. Ian Lund Stidsen, Nuuk
Pokali ingerlaartoq Greenland Strongestimi rekordiliisunut tunniunneqartarpoq. Taatsi Gabrielsenilu Nunatsinniinnaanngitsoq naalagaaffeqatigiinnerli tamakkerlugu rekordiliivoq. Inussivimmiittullu nuannaarlutik nilliaqataalluaqaat 360 kilo kivimmagu.
Taatsi Gabrielsen nukittoorsuuvoq oqaaseqartorsuunngitsoq taamaattumillu aamma naatsumik akissuteqarpoq KNRip aperimmani 360 kilo kiverialeramiuk qanoq eqqarsarnersoq.
- Unnumanna maannarpunga taannarpiaq kivikkiartorlugu, qungujulluni oqarpoq.
Taatsi Gabrielsen aamma siorna Greenland Strongestimi peqataavoq siornamullu sanilliullugu siuariarsimaqaluni.
- Ullut kingulliit sakkortuumik sungisarpugut nerilluarniartarlutalu, Taatsi Gabrielsen oqarpoq.
Kimmip nukini sipaarpai
Taatsi Gabrielsenip toqqaannartumik unammillertaa tassaavoq Andrei Ungureanu Danmarkimeersoq tullersortaanermik naammaginniinnartariaqartoq.
Nunatsinni nukittunersaq Kim Ujarak Lorentzen aamma Danmarkimiit peqataasumit toqqaannartumik unammillerneqarpoq taannalu tassaavoq Danmarkimi nukittunerpaaq Emil Jensen.
Taanna aamma Kim Ujarak Lorentzenimit inissinneqarpoq taamaasillunilu Danmarkimi nukittunerpaatut imminut taasinnaalerluni. Taamaasiorpoq nukini tamakkerlugit atunngikkaluarlugit.
- Pingaartumik dødløftimi nukikka sipaarpakka aammalu log-mi nissukka sulisinnaversaarlugit seeqqukka ippigilaarnikuugakkit, Kim Ujarak Lorentzen oqarpoq.
Naalagaaffeqatigiinnermi dødløftimik rekordimik piginnittuuvoq siorna Greenland Strongestimi 401 kilo kivikkamiuk.
Unamminerlu nukinnik sipaarfigisaa tassaavoq nunarsuarmi nukittuneqqusaanneq Arnold Sportsfestival nunarsuarmi nukittunerpaat 32-it Birminghamimi oktoberip aallartilaarnera unammersuarfissaat.
90 kilo ataallugu oqimaassusilinni Bjørk Lange Kristensen ajugasuuvoq, Pavia Nielsen Uummannameersoq tullersortaasoq. Steffen Knulst Uummannameersoq ujaminnaqataavoq bronzennakkami.
