Kim Ujarak Lorentzen nunarsuarmi nukittunerpaanut unammisussanngorpoq
Oqiliallannerup pianik anersaaruluttoqarpoq Nunatsinni nukittunerpaaq Kim Ujarak Lorentzen unamminermut World strongest manimut pisortatigoortumik qaaqqusaammat.
Maajip naalernerani nunarsuarmi nukittunerpaat unammissavai taakkulu aamma nalunaaquttap akunnerpassuini sungiusartarfinni nukkassareerlutik nunarsuarmi nukittunerpaanngorniunnermi peqataassapput.
Kim Ujarak Lorentzen februari aallartilaartoq aaqqissuisuniit ilimasaarneqarpoq World strongest manimi peqataasinnaasutut. Maannalu tassa qaaqqusissut pisortatigoortoq tunniunneqarpoq.
- Assorsuaq oqiliallappunga. Assorsuaq neriuutiginikuuara World strongest man-mi peqataasinnaanissara, Kim Ujarak Lorentzen oqarpoq.
AAMMA ATUARUK Rekordi nutaaq: Kim Ujarak Lorentzen 425 kilomik dødløftimi kivitsivoq
Ukiup ataatsip iluani maluginiarneqarluarpoq tassami nunanit tamalaaneersut unammineranni Arnold Classicimi Tuluit nunaanni ajugaavoq aammalu februarip qaammataani qivitseriaatsimi dødløftimi rekordiliilluni 425 kilo kivippaa.
- Sungiusarnera ingerlalluarpoq. Pisortatigoortumik qaaqqusaanissara sioqqullugu sungiusarneq aallartereerpara. Taamaattoq pisortatigoortumik qaaqqusissut takkummat allaanngilaq nukissarujussuarmik tunineqarluni, Kim Ujarak Lorentzen oqarpoq.
Unammissanngikkallarpoq
Nukittuneqqusaannerni unammeriaatsini assigiinngitsuni unammisoqartarpoq unamminissarlu qanillilluinnaraangat peqataasussat aatsaat kalerrinneqartarput unammeriaatsit sorliit unammissutaassanersut.
- Taamaattumik pingaaruteqartorujussuuvoq unammeriaatsini sapinngisamik amerlasuuni piareersarluarsimanissaq, Kim Ujarak Lorentzen oqarpoq maannalu sungiusarnermini unammeriaatsit sanngiiffiginerulaakkani aalluppai.
- World strongest man unammersuarnerni qaffasinnersaavoq tassanilu peqataasut nukittunerpaaffimminniittarput. Taamaattumik pissanganartorujuuvoq peqataasunut qanoq nallersuussinnaatigissanersunga, Kim Ujarak Lorentzen oqarpoq.
AAMMA ATUARUK Kim Ujarak Lorentzen Tuluit nunaanni ajugaavoq
Unammisarnerni maanna unikaallakkallarpoq Worlds strongest manimi peqataanissaminut sungiusarneq aallulluarniarlugu aamma nukittorsarnerup saniatigut ajoqusernaversaarnissaq eqqumaffiginiarlugu.
Worlds strongest man Californiami Sacramentomi maajip ulluisa 24-niit 29-ata tungaanut pissaaq.
