Rekordi nutaaq: Kim Ujarak Lorentzen 425 kilomik dødløftimi kivitsivoq
Kim Ujarak Lorentzen qaffasinnerpaaffimmut nutaamut pivoq.
Imminummi qaangerluni sapaatip akunnera kingulleq 425 kilo kivippaa facebookimi toqqaannartumik aallakaatinneqartumik.
- Dødløftimi siornamut sanilliullugu siuariarnera takorusunnikuuvara siorna 410 kilo kivikkakku. Illuatsilluarpara aamma misigisimavuna suli oqimaannerusumik kivitsisimasinnaallunga, Kim Ujarak Lorentzen 425 kilo kivereerlugu oqarpoq.
AAMMA ATUARUK Kim Ujarak Lorentzen Tuluit nunaanni ajugaavoq
Rekordiliisimasullu allassimaffiat qiviaraanni ingerlaannaq malugisassaavoq naalagaaffeqatigiinnermi kisiartaalluni 425 kilomik kivitsisimasuugami. Taannaannaanngilarli. Tassami kivitseriaatsimi tassani Tyskland tamakkerlugu taama oqimaatsigisumik kivitsisoqarnikuunngilaq.
Kim Ujarak Lorentzen aamma pissangaqaluni ullaat tamaasa mailiminut alakkartarpoq.
Nunarsuarmi nukittunerpaanut
Tassami ilisimasaarneqareerspoq nunarsuarmi nukittuneqqusaannissamut qaaqqusaasinnaalluni. Unammineq taanna majimi USA-mi pissaaq.
- Piareersarnermaa aallartinnissaanut qaaqqusissut utaqqeqaarusunngilara. Taamaattumik tamanna siunnerfigalugu sungiusarneq aallartereerpara neriullunga pisortatigoortumik qaaqqusissut qanittumi takkukkumaartoq, Kim Ujarak Lorentzen oqarpoq.
Aamma qaffannerpaaffissap tullissaa piareersarfigilereerpaa.
AAMMA ATUARUK Rekordiliisoq: Kim Ujarak Lorentzenip 401 kilo kivippaa
2020-mi naalagaaffeqatigiinnermi rekordiliilluni 401 kilo kivippaa. Tamanna pitsanngoriartillugu siorna 410 kilo kivippaa. Maanna nunani tamalaani unamminartinneqartaqisoq 1.000 pund angoriarniarpaa taannalu 454 kilop missaaniissaaq.
- Uteriittuunera iluaqutigisarpara. Assersuutigalugu 400 kilo iluatsinngitsoortarnikuuara naggataatigulli iluatsillugu. Maanna 1.000 pund siunnerfigaara siunissamilu 500 kilo kiveriarusullugu, Kim Ujarak Lorentzen oqarpoq.
