Kim Kielsenip siulittaasunngornini pikkunanaarpaa

Siulittaasunngorneq pikkunanaarpara. Aamma akisussaafferujussuaq tiguara. Siumumi siulittaasutut ippassaq qinerneqarnerminut atatillugu Kim Kielsen ilaatigut taama oqarpoq, partiillu imminut kimmaaterujunnatik suleqatigiinnerusinnaanissaat ujartorlugu.
Allattoq Mads Lynge
oktobarip 20-at 2014 06:19

 Siumut Inatsisartunut novembarip 28-ani qinersinermi ajugaassappat maannamut Naalakkersuisuusimasut suliaat nanginneqarumaartut, siulittaasunngortup oqaatigaa:
 
- Suliniuterpassuit ingerlareersut kiingumut qivialaariarutsigit, immikkoortortaqarfiit allallu suliaminnut tunngatillugu maalaaruteqanngillat, aamma Naalakkersuisut suliassat pillugit tunuanngillat. Kisianni uani inuup ataatsip kukkuluttornera pissutaalluni massakkut inissisimaffimmit nutaamiinngaanniit aallartittariaqalersimavugut. Suliassartai suliarineqarsimasullu tunnuartoqanngilaq, taamaammat taakkua suliassat assigiinngitsut nanginniarsaralugit nutaanillu ilaartorlugit iliuuseqarniassaagut, Kim Kielsen, Siumumi siulittaasunngoqqammersoq, oqarpoq.

AAMMA ATUARUK Kim Kielsen Siumumi aaqqissuusseqqissaaq

Partiit qinersereernerup kingorna suleqatigiinnerusinnaanissaat taassuma neriuutigaa:
 
- Partiitut allatuulli soorunami suleqatissarsiussaagut, tamanna qularutissaanngilaq. Aamma neriuppunga partiit akornanni suleqatigiinneq annertooq qinersereernerup kingornatigut pilersinneqarsinnaasoq. Qanorluunniit inissittoqarsimagaluarpat, partiit ataasiakkaat qanorluunniit inissikkaluarpataluunniit amerlanerpaat peqataatinniarsaralugit takorloorpara. Suliassat imaannaanngillat, unammilligassavut. Massakkut ukiorpassuit taamatut ingerlasaqattaarnerput naammalerpoq. Suleqatigiinneq annertooq ujartorneqartariaqarpoq, Kim Kielsen oqarpoq.
 
Siumumi siulittaasussarsiortoqarmat Kim Kielsen 44-nit qinerneqarpoq, Lars-Emil Johansen 17-init qinerneqarluni, Doris Jakobsenilu Nick Nielsenilu tamarmik immikkut marlunnik qinerneqarlutik.
 
Kim Kielsenillu Siumumi siulittaasutut qinerneqarnini pikkunanaarsimavaa:
 
- Pikkunanaarpara, taama oqarusuppunga. Siulittaasunngorneq, aamma akisussaafferujussuaq tiguara, kisianni tunuliaquttat peqatigalugit soorunami ingerlanissara qularutigineqassanngilaq, Kim Kielsen, Siumumi siulittaasunngoqqammersoq oqarpoq.

AAMMA ATUARUK Kielsen Siumumi siulittaasunngorpoq

Partiip Inatsartunut qinersinissamut pingaarnertut suut anguniagarinerai ullumi ataasinngornermi saqqummiunneqarumaartut, Kim Kielsenip oqaatigaa.