Kim Kielsen naalakkersuisut suliassaannik agguataarivoq
Naalakkersuisunut ilaasortat marluk sapaatip-akunnerata siuliani napparsimalerput. Simon Simonen stressernini pillugu sapaatip-akunnerini sisamani sulinngiffeqarallalerpoq, Siverth K. Heilmannilu aqaguani iluaallernermi kingorna napparsimmaviliaanneqarpoq, sulinngiffeqarallassallunilu.
Naalakkersuisunut ilaasortat marluk suliassaqarfiisa allanngortikkallarneqarnissaat Naalakkersuisut siulittaasuata Kim Kielsenip aalajangerpaa.
AAMMA ATUARUK Siverth K. Heilmann ajunngilaq
Aatsitassanut Suliffeqarnermullu naalakkersuisup Erik Jensenip , Siverth K. Heilmannip napparsimanerata nalaani Avatangiisinut Ilisimatusarnermullu naalakkersuisoqarfimmi suliassat tamanna pillugu tigummigallassavai.
Inuussutissarsiornermut Nukissiuuteqarnermullu naalakkersuisup Aqqalu Jeremiassenip, Simon Simonsenip napparsimanini pillugu sapaatip-akunnerini sisamani sulinngiffeqarnissaa pillugu Ineqarnermut Attaveqaqatigiinnermullu naalakkersuisoqarfiup suliassai tigummigallassavai.
AAMMA ATUARUK Simon Simonsen napparsimalluni sapaatit akunnerini sisamani sulinngiffeqassasoq
Sapaatip akunnerani matumani ”Ineqarnermut Attaveqaqatigiinnermullu” tunngatillugu Inatsisartuni oqaluuserineqartussat isumaqatigiissutaareersut naapertorlugit Naalakkersuisumit Erik Jensenimit aamma Naalakkersuisumit Vittus Qujaukitsumit agguataarneqarumaarput.
AAMMA ATUARUK Martha Abelsen naalakkersuisunngortinneqartoq