Simon Simonsen napparsimalluni sapaatit akunnerini sisamani sulinngiffeqassasoq

Attaveqaqatigiinnermut ineqarnermullu naalakkersuisoq Simon Simonsen stressernini pissutigalugu sapaatit akunnerini sisamani sulinngiffeqarallartussanngorpoq. Simon Simonsenip allattaata KNR-imut tamanna uppernarsarpaa.

Allattoq Anton Gundersen Lihn, Simon Uldum

oktobarip 30-at 2018 13:25

Nutartigaq nal. 17.10.

Simon Simonsen stresserpoq nakorsaminillu sulinngiffeqarallarnissaminik kaammattorneqarluni, Sermitsiaq.AG taama allaaserisaqarpoq.

Naalakkersuisup napparsimalluni sapaatit akunnerini sisamani sulinngiffeqarallartussanngornera Simon Simonsenip allattaata Steve Sandgreenip KNR-imut uppernarsarpaa.

Mittarfiliortiternissaq pillugu inatsisip Inatsisartuni aappassaaneerneqarnissaa ullunik marlunnik sioqqullugu taama nalunaaruteqartoqarpoq.

Simon Simonsenip mittarfiliortiternissaq pillugu inatsimmik saqqummiussinissaanut aamma attaveqaqatigiinnermut ineqarnermullu naalakkersuisutut sapaatit akunnerini sisamani taartigigallagassaanik Kim Kielsen taamaalilluni pissarsiortussanngorpoq.

Attaveqaqatigiinnermut ineqarnermullu naalakkersuisup, Simon Simonsenip akisussaaffii sapaatit akunneri sisamat ingerlanerini kikkunnit tiguneqassanersut suli aalajangiiffigineqanngitsoq, Naalakkersuisut Siulittaasuata Naalakkersuisoqarfiata KNR-imut nalunaarutigaa.

Taamaattumik politikkikkut akisussaaffiit Naalakkersuisut siulittaasuata akisussaaffigai, Inatsisartunilu suliat aallaavigalugit, Kim Kielsenip Naalakkersuisunut ilaasortat suliakkissinnaagai, Naalakkersuisut Siulittaasuata Naalakkersuisoqarfiata ilisimatitsissutigaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.