Kim Kielsenip ammaalluni oqalugiarnera: Coronap ilungersunartorsiortitsinera, aatsitassat kinguaassiutitigullu atornerluinerit

Inatsisartut ukiakkut ataatsimiinnerat aqqanermut aallartippoq. Naalakkersuisullu siulittaasuat, Kim Kielsen (S) pisarneq malillugu oqalugiarpoq - oqalugiarnera coronamut pingaarnertut sammivoq.

- Piffissaq una nunarsuarmioqatigiit tamatta inuuffigisarput immikkuullarilluinnaraluartoq Inatsisartut ukiakkut ataatsimiinnerat piviusunngorsinnaammat nuannaarutigaara, Kim Kielsen oqarpoq.

Taassuma oqalugiarnini peqqinnissamik suliaqartut coronavirusimut isersitsaaliuisut aallaqqaasiutigalugu qujassuteqarfigai.

- Corona akuutillugu nunatsinni ulluinnaat aallarteqqinnissaannut annertuupilussuarmik suliaqarsimammata qujassuteqarfigaakka, Naalakkersuisut siulittaasuat oqarpoq.

Piffissarlu Kim Kielsenimut aamma imaannaasimanngilaq.

- Nappaassuaq nunani sanilerisatsinni tunillaassuulluni aallartimmat, aalajangiinerit oqimaatsut uannut aalajangingassanngortarsimapput.

AAMMA ATUARUK Ukiakkut ataatsimiinneq isumaqatigiinngiffiulluni aallartissasoq: Naalakkersuisut marluk navianartorsiortut

- Tamanna oqitsuinnaasimanngilaq, allanimmi “aperisassaqarsimanngilanga”. Nalunngilaralu kukkuguma akisussaaffik uanniissasoq. Ullullu tamaasa Nunaga inuisalu eqqugaannginnissaannik kissaateqarlunga qinnuttarpakka.

Taassuma Inatsisartut allallu tassunga attuumassuteqartut coronap ilungersunartorsiortitsinerani naammagittarnissaannik kaammattuuteqarfigai, coronallu ilungersunartorsiortitsinera ataatsimut qaangerneqarnissaa neriuutigalugu.

Coronap ilungersunartorsiortitsinera ikiorsiissutillu

Ukiuni tulliuttuni coronap sunniutai aningaasarsiornikkut malunniuteqarnissaat naatsorsuutigissavarput, Naalakkersuisut siulittaasuat oqarpoq.

Naalakkersuisut aningaasanut inatsissatut siunnersuutaat 183 millionit koruuninik amigartooruteqarfiuvoq.

Naalakkersuisut siulittaasuata coronap ilungersunartorsiortitsinerani aningaasartuutit milliardit affaasa missaanniinnissaat naatsorsuutigaa.

Naalakkersuisulli anignaasaqarnikkut patajaatsumik inissisimasoqarnera nalilerpaat, tamannalu inuiaqatigiinni ingerlanissamut qulakkeerutaassaaq.

Coronallu ilungersunartorsiortitsinera pissutigalugu siunissaq suli qularnarpoq, taamaammat Naalakkersuisut siulittaasuata Inatsisartut aningaasaqarnermut atatillugu mianersortumik eqqarsarluaqqaarlutillu iliuuseqartarnissaannik piumasaqarfigai.

AAMMA ATUARUK Ilisimatooq ukiakkut ataatsimiinnissaq pillugu: Aningaasanut inatsit, nannut Nuugaatsiarlu isiginiassavatit

- Taamaattumik Naalakkersuisuni siunnersuutinik aningaasanik malitseqarpallaartussanik siunnersuuteqarnissaq pinaveersimatissallugu aalajangersimavugut.

- Taamaattorli nunatta siunissaa anigaasaliiffigisariaqarparput ineriartorneq unittuussanngippat. Kaammattuutigaaralu tamanna anersaaralugu siunnersuutit isummerfigisarumaarisi.

Aatsitassarsiornermik ingerlatsineq

- Nunatta siunissami aningaasaqarnikkut qaffasinnerusumik inissisimalernissaa, aningaasarsiornikkullu isaatitsivissanik nutaanik pilersitsinissap aqqutissiuunnissaa, aatsaat taamak pingaaruteqartigaaq, Naalakkersuisut siulittaasuat oqarpoq.

Kim Kielsenip aatsitassarsiornermik suliaqarneq isaatitsinissamut periarfissatut siornatigornit pingaaruteqarnerungaatsialersoq aamma oqaaseqarfigaa.

Naalakkersuisut Tanbreez piiaanissamut kingullermik akuersissuteqarfigaat. Kim Kielsenip Dundas Titatiumimit Moriusami piiaanissamut ukiup naannginnerani akuersissuteqarnissaq aamma naatsorsuutigaa.

Nunattali kujataani Kuannersuarni suliniut Greenland Mineralsilu kingullermik ASN-imik nalunaajaanerannik Avatangiisinut aqutsisoqarfimmit aatsitassaqarnermut susassaqarfimmit akuersissuteqarfigineqartut eqqaaneqanngillat.

Nunattali kujataani innuttaasut Qaqortumi 2024-mi mittarfittaarnissaat naatsorsuutigaa.

Mittarfimmik sanaartornissaq suliariumannittussarsiuussinermi akit Kalaallit Airportsip akilersinnaanngimmagit qanittumi taamaatiinnarneqarpoq. Suliariumannittussarsiuussinermi akit neqeroorutigineqartut akisuallaarsimapput.

AAMMA ATUARUK Qaqortumi mittarfiliornissamut suliariumannittussarsiuussineq taamaatiinnarneqartoq

- Kujataani Qaqortumi mittarfissap sananeqarnissaa avaqqunneqarsinnaanngilaq. Kujataani inuerukkiartorneq pakkersimaartariaqarpoq. Ineriartorneq suliffissanillu pilersitsinissamut periarfissat annertusartariaqarput.

- Ineriartorneq taamanna Naalakkersuisuniit aalajangiusimavarput inuiaqatigiittullu assigiinnerusumik ineriartornissamut aqqutissat pingaarutillit ilaattut isigalugu.

Meeqqat ilaat toqqissimallutik peroriartorneq ajortut

Naalakkersuisut siulittaasuata innuttaasut atugarissaarneranni toqqissisimanerannilu meeqqanut inuusuttunullu pitsanngorsaanissaq aamma eqqaavaa.

- Oqaatigissallugu annernaraluartoq, angajoqqaat ilaasa meeqqanik inuusuttunillu sumiginnaasarnerat annertuallaaqaaq, aammalu inuit ilaasa kinguaassiuutitigut atornerluisarnerat annertuumik ajornartorsiutaavoq. Tamanna akuersaarneqarsinnaanngilaq, Kim Kielsen oqarpoq.

AAMMA ATUARUK Martha Abelsen sumiginnaaneq atornerluinerlu pillugit: Maannakkut assoruussaagut

Taassuma misissuinerni kingullerni meeqqat 1995-ip kingorna kingusinnerusumiluunniit inunngorsimasut 20 procentii kinguaassiutitigut atornerlunneqarsimasut takutinneqartoq oqaatigaa. Tamatumalu saniatigut meeqqat pingajorarterutaat angajoqqaaminnik sumiginnagaasutut misigisimasarnerarlugit.

- Pinerluttoqarsimatillugu eqqugaasut inatsisitigut illersorneqarnerisa pitsaanerulersinnissaat anguniarlugu Naalakkersuisut suliuniuteqarnertik ingerlatiinnarpaat.

Oqalugiaataa tamaat uani atuarsinnaavat.