Kim Kielsen politikerit katersuussinnaanerat pillugu: Tunngaviusumik inatsit aallaaviuvoq

Naalakkersuinikkut suliallit katersuussinnaanerat tunngaviusumik inatsimmit illersuugaavoq. Coronavirusi pillugu nalunaarutip politikerinut katersuutsitsisinnaanera pillugu isornartorsiuisoqartupilussooreersoq, Naalakkersuisut siulittaasuat, Kim Kielsen, taama oqarpoq.
- Uaniittoq tunngaviusumik inatsimmit aallaaveqarpoq. Politikkikkut suliniutit assigiinngitsut killilersorneqarsinnaanngillat, Kim Kielsen oqarpoq. Assi © : KNR
aggustip 17-at 2020 12:55

- Uaniittoq tunngaviusumik inatsimmit aallaaveqarpoq. Politikkikkut suliniutit assigiinngitsut killilersorneqarsinnaanngillat, Kim Kielsen oqarpoq.

Coronavirusi nunatsinni tunillaassuutileqqunagu killilersuinermut nalunaarut tunngaviusumik inatsimmik tunngaveqartariaqartoq, Kim Kielsen oqarpoq.

Katersuunnissamut malittarisassat

Inuit amerlanerpaamik 100-it januarip ulluisa 31-ata tungaanut illup iluani katersuussinnaapput. 

Silami inuit amerlanerpaamik 250-it katersuussinnaapput.

Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:

"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."

Danskit peqqissutsimut utoqqarnullu ministereqarfiata tunngaviusumik inatsimmi katersuussinnaaneq pillugu paragrafimik nassuiaataanut taanna innersuussivoq.

AAMMA ATUARUK Politikki pillugu aviisimi aaqqissuisoq: Corona pillugu ingerlanerliorneq

Nassuiaat taanna nappaalaneq pillugu inatsisimmi ilaavoq.

Katersuussinnaanermut killilersuinerit naalakkersuinikkut allatulluunniit isummersornissamik siunertalinnut atuutinngitsut nappaalaneq pillugu inatsisissatut siunnersuummut, maanna akuersissutigineqareertumut, isumaliutissiissummi atuarneqarsinnaavoq.

Taannalu aamma nunatsinni atuuppoq.

- Soorlu aamma akerliussutsimik takutitsinerit ingerlanneqarsinnaasut. Tamakkua tunngaviusumik inatsimmiipput. Taamaammat illersugaapput taavalu tamanna nalunaarutikkut ersarissarneqartussaallutik.

AAMMA ATUARUK Kielsen coronamut atatillugu isornartorsiorneqarnerminut illersortoq: Issiaannassaanga!

Peqatigiiffiit arlallit nalunaarut peqqutigaluigu ilaatigut ataatsimeersuarnissaminnik taamaatitsisariaqarsimapput.

Taamaattoqarnerani Siumut nunatta annersaannit 63-inik peqataasoqarluni ataatsimeersuarniarluni nalunaarpoq.

Peqatigiiffiit kommuninit allanit peqataasoqarluni katersuussinnaannginneri peqatigiiffinnit politikeriniilllu arlalinnit paasiuminaatsinneqarpoq sakkortuumillu isornartorsiorneqarluni.

AAMMA ATUARUK Corona pillugu suleqatigiilluartoqanngitsoq – Soorlu qarmaq oqaluullugu

Naalakkersuinikkulli partiit peqatigiiffiillu sulineri assigiinngissuteqartut, Kim Kielsen oqarpoq.

- Taakkua soqutigisalittut inissisimagamik, imaanngitsoq nuna tamakkerlugu suliassanut tunngasunut suliaqartuullutik, Kim Kielsen oqarpoq.

Pitsaanerusumilli paasissutissiisinnaasimagaluarlutik nassuerutigaa. Naalakkersuisut siulittaasuata naalakkersuisoqarfiata pisortaa nunattalu nakorsaanera tusagassiortunik nalunaaqutaq ataatsimut katersortitsissapput.