Kielsen coronamut atatillugu isornartorsiorneqarnerminut illersortoq: Issiaannassaanga!
![](/sites/default/files/styles/image_934x467/public/article_images/kim_kielsen_6.jpg?itok=j9mhr8aA)
Kim Kielsen sapaatini akunnerni marlungajanni nipaareerluni kiisami oqaaseqarpoq.
Naalakkersuisut siulittaasuat sapaatini akunnerni marlunni isornartorsiorneqaqattaarpoq. Timersortartut, kulturip illorsui, nipilersortartut, atuakkiortut peqatigiiffiat, utoqqaat kattuffiat, SIK, Sulisitsisut isornartorsiuisut ilaanniipput.
Illuatungiliuttut pakatsisimasunut marlunngormat ilanngupput. Inuit Ataqatigiit, Atassut, Suleqatigiissitsisut Partii Nalerarlu Naalakkersuisunut ammasumik allagaqarlutik corona pillugu malittarisassat tukannerarlugillu ataqatigiinnginnerarpaat.
AAMMA ATUARUK IA Nalerarlu Kielsenimut: Tunuarit!
Katersuunnissamut malittarisassat
Inuit amerlanerpaamik 100-it januarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
Tamatuma saniatigut Naalakkersuisunit qaangiinnarneqarlutik, tusarnaarneqanngitsutut misigisimapput. Ullumilu tallimanngornermi Partii Naleqqap siulittaasuata Hans Enoksenip Inuit Ataqatigiillu siulittaasuata Muté Borup Egedep siulittaasoq tunuaqquaat.
Kim Kielsenili tunuarusunngilaq.
- Ataatsimiinnerit tamaasa allatigullu susoqarnerit tamaasa illuatungiliuttut piumasaqaataat naapertorlugit Naalakkersuisut siulittaasuattut ilumut tunuartassappat? Imaluunniit arlaannik naaperiuteqarsinnaavugut?, Kim Kielsen oqarpoq.
Erseqqissoqarnissaa pisariaqartoq
Inuit amerlanerpaamik 100-it kisimik illup iluani katersuuteqqusaanerannut inuillu amerlanerpaamik 250-it silami katersuuteqqutaanerannut peqqussutit januaarip ulluisa 31-annut atuupput. Aammattaaq kommunimit kommunimut allamut angalalluni aaqqissuussinernut peqataajartoqqusaanngilaq – politikerit kisimik taamaaliorsinnaapput.
Assersuutigalugu Siumut nuna tamakkerlugu Ilulissani septembarip ulluisa sisamaanit arfernanut ataatsimeersuassaaq, nunatsinniillu sumiiffinnit amerlanerpaaneersunit 68-it peqataassallutik.
Nalunaarutilli oqaasertai ersernerlupput. Killilersuutaagallartut atuuttut naapertorlugit killilersuinerit ”katersuunnernut naalakkersuinikkut allatulluunniit isummersornissamik siunertalinnut atuutinngillat”.
AAMMA ATUARUK Corona pillugu suleqatigiilluartoqanngitsoq – Soorlu qarmaq oqaluullugu
Pingaartumillu tamanna kattuffiit soorlu timersortartut peqatigiiffiisa, atuakkiortut peqatigiiffiata, nipilersortartut kattuffiata, kulturikkut illorsuit allallu qassiiusut ullorpassuarni KNR-ikkut isornartorsiorpaat.
Kim Kielsen erseqqinnerusoqarnissaata pisariaqarnera nassuerutigisinnaavaa.
- Innuttaasut avammut saqqummiussiffiginissaat pisinnaassapput, aamma akulikinnerusumik pisinnaasarnissaat sulissutigineqartariaqarpoq. Taanna ilumoorpoq, Naalakkersuisut siulittaasuat oqarpoq.
Siulersuineq akisussaassuseqarnerlu
Partii Naleraq Naalakkersuisut coronap ilungersunartorsiortitsinerani aqutsinerannut kamaateqarnerminik qularinninngilaq. Illuatungiliuttut partiiata oktobarimi ataatsimeersuarnissaraluani taamaatiinnarlugu ullumi tallimanngornermi nalunaarutigaa. Tamanna naak coronamut malittarisassat naapertorlugit pisinnaatitaaffigigaluarlugu.
- Unneqqarissuseqarnissaq inatsisinillu malinninnissaq kissaatigigutsigu taama politikeriusugut akisussaassuseqarlutalu siulersuinermik takutitsissaagut, Hans Enoksen KNR-imut oqarpoq.
AAMMA ATUARUK IA Nalerarlu Kielsenimut: Tunuarit!
Tamannali Naalakkersuisut amerlanerussuteqarnerannut – illuatungiliuttulli ikinnerussuteqarnerannut allannguinngilaq.
- Isummat assigiinngissinnaasarput. Kisianni sapinngisarput tamaat naalaalaariarlugit amerlanerussuteqartut aalajangigaat amerlanertigut apuunneqartarput. Taanna oqaatigerusuppara, Kim Kielsen oqarpoq.