Nunap siuttua erseqqissumik nassuiaasinnaasariaqarpoq. Kim Kielsenili taamaaliunngitsoq, Múte B. Egede Hans Enoksenilu isumaqarput.Assi: KNR

IA Nalerarlu Kielsenimut: Tunuarit!

Siuttoq nassuiaalluarsinnaasariaqarpoq, Kim Kielsenili coronamut malittarisassanik nassuiaateqanngilaq, Múte B. Egede Hans Enoksenilu oqarput.

Kim Kielsen, tunuarniarit! Illuatungiliuttut siuttui marluk taama oqarput.

Attaveqatigiinnginneq illuatungiliuttunut pakatsisitsilluinnalerpoq.

Nunami siuttoq aalajangikkat pillugit ersarissumik nalunaarsinnaasariaqarpoq. Kim Kielsen taamaassinnaanngilaq. IA-p siulittaasua Múte B. Egede Partii Naleqqallu siulittaasua Hans Enoksen taama isumaqarput, taakkualu Kim Kielsenip siuttuunera apeqquserujussuarpaat.

AAMMA ATUARUK Partii Naleraq kamassimasoq: Ataatsimeersuarnissaq kinguartikkaa

- Naalakkersuisut inuiaqatigiinnut paasissutissanik tunniussisinnaanngikkunik oqaaseqarnaveersaarlutillu inissisimaniarunik imminnut aperisariaqarput, ilumut eqqortumik tassaniissinnaanerlutik, Múte B. Egede oqarpoq.

Partii Naleqqamiit aamma taama nipeqarput:

Katersuunnissamut malittarisassat

Inuit amerlanerpaamik 100-it januarip ulluisa 31-ata tungaanut illup iluani katersuussinnaapput. 

Silami inuit amerlanerpaamik 250-it katersuussinnaapput.

Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:

"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa." 

- Naalakkersuisut piaarnerpaamik kaammattussavakka, taama matoqqatigisumik aqutsinerat pissutigalugu nalunaaruteqartariaqartut tunuarlutik, taavalu inuiannut nalunaarutigalugu piaarnerpaamik qinersinissaq.

- Taamaalilluni aatsaat pissutsit allanngortinneqarsinnaapput. Matoqqasumik ingerlatsineq tamatta akueriunnaarparput, Hans Enoksen oqarpoq.

Naalakkersuisunut allakkat ammasut

Taakkua illuatungiliuttut siuttuinut, coronamut tunngatillugu killilersuinernut, tukattutut ataqatigiinngitsutullu isigisaminnut, isornartorsiuisunut ilaapput.

Aamma peqatigiiffiit inuussutissarsiortullu corona pillugu malittarisassanut, kommunimi allami najugaqaraanni aaqqissuussanut allatsiffigeqqaarlugit peqataaffigineqartussanut inerteqqusiisunut, isorinneqaat.

AAMMA ATUARUK Politikki pillugu aviisimi aaqqissuisoq: Corona pillugu ingerlanerliorneq

KNR-ip Kim Kielsen nalunaarutinut pakatsisimaarneq pillugu aggustip ulluisa pingajuannili akissuteqartinniaraluarpaa, tamannali maannamut suli iluatsinngilaq.

Illuatungiliuttullu iluatsitsinerunngitsut, Hans Enoksen oqarpoq.

- Massakkumut minnerpaamilluunniit titarnermik ataatsimik imaluunniit oqaatsimik ataatsimik akissutissarsinngilagut. Tamannalu aamma soorunami suliniuteqartuulluni ilungersunartorujussuuvoq, taanna oqarpoq.

Pakatsisimaartiginneqassanngikkaluartut

Múte B. Egede taama aamma isumaqarpoq. Ersarissumik tamanut nalunaaruteqartarnissaq naalakkersuisut suliassaanni pingaarnerpaanut ilaasoq taanna isumaqarpoq.

- Tamatta inuiaqatigiit sinnerlugit politikkikkut sulivugut. Aamma naalakkersuisuuneq tassaavoq, isumaqatigisat isumaqatiginngisallu sinnerlugit siuttuuneq, taamaammallu pisariaqarpoq, assigiimmik naligiimmillu ingerlatsilluni pinissaq. Taamaammat ersarissumik oqaatigisariaqarpoq, tassaniinniaraanni taava aamma inuiaqatigiinnut attaveqarsinnaasariaqarpoq, Múte B. Egede oqarpoq.

AAMMA ATUARUK Illuatungiliuttut ataatsimoorlutik Naalakkersuisut isornartorsiorpaat: Coronap akiorniarneranut ataqatigiittoqanngilaq

Hans Enoksen isumaqataavoq. Naalakkersuisut aamma ersarissumik nalunaaruteqartarsimasuuppata inuit taama pakatsisimaartigissanngikkaluartut, taanna nangippoq.

- Innuttaasut kattuffippassuillu ilungersunartumik inissisimasut naammagittaalliutaat allallu akineqarsinnaanngitsut eqqarsaatigissagaanni oqaaseqarnissaq pingaartorujussuuvoq. Aamma inuiaat eqqissitissagaanni, Hans Enoksen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat