Partii Naleraq kamassimasoq: Ataatsimeersuarnissaq kinguartikkaa
Partii Naleraq Nuummi oktobarimi ataatsimeersuartussaagaluarpoq.
Ataatsimiinnermut ilaasortat 40-t missaanniittut peqataasussaagaluarput. Tamannali taamaatiinnarneqartoq, siulittaasup, Hans Enoksenip paasissutissiissutigaa, Naalakkersuisullu isornartorsiorlugit.
- Nunatsinni timersortartorpassuit ataatsimiissinnaanngitsut unammersuarsinnaajunnaarsinnaanngitsullu nalaappagut. Naalakkersuisut imminnuinnaq pingaartillutik nalunaarusiorsinnaanngillat, taamaasiorneq demokratiimik innarliineruvoq, innuttaasummi assigiimmik naligiimmillu pineqartariqarput, Hans Enoksen oqarpoq.
Partiip nunatta tamakkerlugu ataatsimeersuarnissaa qaqugumut piffissalerneqassanersoq suli ilisimaneqanngilaq.
AAMMA ATUARUK Illuatungiliuttut ataatsimoorlutik Naalakkersuisut isornartorsiorpaat: Coronap akiorniarneranut ataqatigiittoqanngilaq
Corona pissutigalugu malittarisassat naapertorlugit kommunimit kommunimut allamukarluni aaqqissuussinernut nalunaaruteqarfiusussanut peqataajartornissaq inerteqqutaavoq.
Politikerilli kommunimit kommunimut angalasinnaallutillu ataatsimeersuariartorsinnaapput, taakkumi nalunaarutimi inatsisini atuutinngillat - Siumut Ilulissani nuna tamakkerlugu septembarip 4-aanit 6-ianut ataatsimeersuassaaq siulittaasumillu taasisoqassalluni.
Inuit amerlanerpaamik 100-it januarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
Nalunaarutilli oqaasertai eqqunngillat. Killilersuutaagallartut atuuttut naapertorlugit killilersuinerit ”katersuunnernut naalakkersuinikkut allatulluunniit isummersornissamik siunertalinnut atuutinngillat”.
Partii Naleqqalli ataatsimeersuarnissaminut pisinnaatitaaffik taanna atornianngilaa.
Atuakkiortut, nipilersortartut suliffeqarfiillu peqatigiiffii
KNR-ip atuakkiortut, nipilersortartut utoqqaat peqatigiiffii ilaatigut kommunimit kommunimut angalalluni aaqqissuussisinnaanatillu tusarnaartitsisinnaanngitsut sapaatip akunnerani kingullerni saqqummiuppai.
Timersortartut aamma pisinnaatinneqanngillat - nunatsinni ukioq manna pissartanngorniuttoqassanngilaq.
AAMMA ATUARUK Politikki pillugu aviisimi aaqqissuisoq: Corona pillugu ingerlanerliorneq
Aammattaaq Sulisitsisut kingullermillu politikerit illuatungiliuttut tassaasut Inuit Ataqatigiit, Suleqatigiissitsisut, Atassut Partii Naleqqallu Naalakkersuisunut sammisumik isornartorsiuingaatsiarput.
Taakku allat kommuninit kommuninut allanut angalaqqusaanngippata sooq politikerit angalaqqusaassanersut paasisinnaanngilaat.
illuatungiliuttut isornartorsiuinerat Naalakkersuisunut ammasumik allagaqarnikkut saqqummiunneqarpoq. Illuatungiliuttut Naaalakkersuisunit suli tusagaqanngillat.
- Kattuffinnit assigisaanillu saaffiginnissutit akineqarneq ajorput. Tamanna naleqqutinngissoraarput, Hans Enoksen KNR-imut oqarpoq.
- Akisussaassuseqassaagut
Naalakkersuisut juulip ulluisa 31-anni tusagassiortunik kingullermik katersortitsipput, tassanilu nalunaarut kingornatigut isornartorsiorneqangaatsiartoq saqqummiunneqarluni.
KNR-ip Kim Kielsen Naalakkersuisulluunniit allat aggustip ulluisa pingajuannili isornartorsiuisoqaraluttuinnarneranut oqaaseqartinniarsarigaluarpai, apersorneqarsinnaasumilli iluatsitsisoqarani.
AAMMA ATUARUK Corona pillugu malittarisassat paatsuungassutigineqartut: Allat aamma ersarissaaqqusisut
Partii Naleqqalli nuna tamakkerlugu ataatsimeersuarnissaanut allanik aamma pissutissaqarpoq.
- Ulluni makkunani nunarsuarmi covid19-ip atugaajartuinnarnera, minnerunngitsumillu angallannikkut toqqaannartumik angallavitsinni Danmarkimi covid19-ip atugaanera sillimanarsigaluttuinnarmat, Hans Enoksen oqarpoq.
Partiit allat ilissitulli iliorlutik ataatsimeersuarnissaminnik taamaatitsisariaqarsorivisigit?
- Partiinut allanut akulerutissanngilagut. Kisianni unneqqarissuseqarnissaq inatsisinillu malinninnissaq kissaatigigutsigu taama politikeriusugut akisussaassuseqarlutalu siulersuinermik takutitsissaagut, Hans Enoksen KNR-imut oqarpoq.
