Kim Kielsen: Demokraatit naalakkersuisoqatigiinnit aninerat paasisinnaavara
Nunatta politikkiani ippassaq pisoqartupilussuuvoq.
Deokraatit naalakkersuisoqatigiinnit tunuarput matumillu matusillutik.
Tamannalu Naalakkersuisut siulittaasuata, Kim Kielsenip paasisinnaalluarpaa. Tamaviaanarsimasoq taanna oqarpoq.
- Soorunami ilisarnarput, aamma taama qisuariaateqartut. Tassami ukiut kingulliit marluk tamaviaarnartarsimaqaaq, Kim Kielsen Qanoruumut oqarpoq.
Demokraatit qaammatini quliinnarni naalakkersuisoqataapput.
Demokraatit qinersisoqarnerata kingorna ukiut marluk sinnerlugit siornalu maajip tungaanut Naalakkersuisunut ikiorfartortaasimapput. Maanna Siumut Nunatta Qitornaalu ikinnerussuteqarlutik naalakkersuisoqatigiilerput.
Steen Lynge, nunanut allanut nukissiuuteqarnermullu naalakkersuisoq.
Kim Kielsenip akisussaaffik tiguaa Naalakkersuisullu siulittaasuatut ingerlaannarluni.
Anna Wangenheim, peqqissutsimut naalakkersuisoq.
Martha Abelsen akisussaaffik tiguaa tamatuma saniatigut isumaginninnermut inatsiseqarnermullu naalakkersuisuunini ingerlatiinnarlugu.
Kiisalu Jens Frederik Nielsen, aatsitassanut inuussutissanullu naalakkersuisoq.
Vittus Qujaukitsup akisussaaffik tiguaa aningaasaqarnermullu naalakkersuisutut atuutiinnarluni.
Tassanilu Demokraatinit ikorfartorneqarnissaq naatsorsuutigineqarsinnaanngitsoq, Demokraatit siulittaasuat, Jens Frederik Nielsen ippassaq oqarpoq.
Taamaammat Naalakkersuisuni unammillertoqaannartussangavoq. Unammillerneq taanna pingaartumik Siumup partiiata iluaniinnerussaaq.
AAMMA ATUARUK Demokraatit naalakkersuisoqataajunnaartut
- Allaat Siumormioqatit Siumup anguniagaanik atsiortittarlugit. Taanna piviusuusimavoq. Suliniutini annertuuni, mittarfissuarnut tunngasut allallu pillugit Siumormioqatit atsiortittariaqarlugit.
- Inuttut ataasiakkaatut siunnerfiit tamakkua imminut salliutittarmassuk. Uggornartaqaaq. Inuiaqatigiit tamaasa assigiimmik kiffartuunniarlugit nukik aamma illuanut taama atortarlugit. Ajorpoq, Kim Kielsen Qanoruumut oqarpoq.
Taassuma apersorneqarnermi pisut inuillu aalajangersimasut eqqaanngilai.
Demokraatit Kielsenip naalakkersuisoqatigiivinit anineranut Siumumi avissaartuunneq ilaavoq. Oqallinnerpassuillu suleqatigiinnermut aamma sunniuteqarput:
- Ilaatigut taamatut malartaaserluni uteriiserneq ukiuni kingullerni ilisarnaataavallaarujussuarpoq, naalakkersuisoqatigiinnullu nukillaarsaataalluni, Kielsen oqarpoq.
Nunatta Qitornai Siumullu maannakkut naalakkersuisoqatigiipput, taakkulu aqqanilinnik Inatsisartunut 31-usunit qinigaatitaqarput.
Naalakkersuisoqatigiilli qanoq sivisutigisumik atuussinnaanersut apeqqutaalerpoq.
Siumup siulittaasortaava Erik Jensen tunuani apersuivoq. Taanna partiimi Kim Kielsen taarserlugu novembarimili siulittaasuulerpoq.
Kim Kielsenili Naalakkersuisunut suli siulittaasuuvoq – issiavillu taanna Erik Jensenip aamma ingiffigerusuppaa.
AAMMA ATUARUK Demokraatit naalakkersuisoqatigiinnit aninerisa kingorna: Kielsen qinersinissamik suaaruteqanngitsoq
Ukiukkut ataatsimiinneq marlunngorpat aallartissaaq, tassanilu Inatsisartuni politikerit tamarmik Nuummi katersuutissallutik.
Tamanna pissanganassaaq Naalakkersuisummi siulittaasuat eqqissisimasumik tunuarsinnaavoq, siulittaasuuffinilu allamut ingerlateqqillugu. Inatsisartunili amerlanerussuteqartut aamma tatiginninnginnermik nalunaaruteqarsinnaapput – taamaattoqassappallu qinersisoqassalluni.
Kielsenip Erik Jensenimit taarserneqarnissani akuerissaneraa aperineqarami ima akivoq.
- Inatsisartut tamanna nalilersussavaat. Ikinnerussuteqarluta massakkut ingerlavugut, taava qanoq alloriartoqassanersoq Inatsisartut inersuarmi aalajangerumaarpaat.
