Kilisaat qimaasoq tigusaraat
Savalimmiut imartaani franskit kilisaataat unioqqutitsilluni aalisarsimasorisaasoq pisaanik arsaarneqarsimavoq.
Arsaarinninneq tamanna Københavnimiittoq Interpooli, Savalimmiut politiivi Skotlandimilu politiit taamatuttaaq Tuluit Nunaata politiivi qanittumik suleqaginerisigut pisinnaasimavoq.
Oqaluttuarineqarporli franskit kilisaataat pissangartumik qimaasimagaluartoq allaat qimaaniangaarami umiarsuaq misissuisoq Hvidbjørnen aportuinnanngorsimallugu.
Kilisaat Skotlandiliaanneqarpoq pisaallu unioqqutitsilluni pisarineqarsimasut nalunaarutigineqarlutik.
Taama misissuinerup saniatigut Skotlandimi politiit kilisaammut pakasaallutik aamma paasiniaapput.
- Umiarsuaq pakasaaffigineqaraangat sunannguaq tamaat missorneqartarpoq, taakkulu tamarmik allattorneqartarput,
Taama Savalimmiuni politeeq Linda Hesselberg oqaluttuarpoq.
Oqaatigineqarporlu arsaarinnissutigineqartut 2,5 mio. koruuninik naleqartut – taakkulu saniatigut aamma kilisaat bankimut 1,2 mio. koruuninik qularnaveeqqusiisussanngortinneqarpoq.
Kingornalu eqqartuussivik aamma aqqusaarneqassasoq oqaatigineqarpoq, taamaattoqarsimatillugulu nalinginnaasumik eqqartuussereernermi 100.000 koruuninik naleqarajuttarpoq, taakkulu suli qaffannerusinnaapput tassami kilisaat qimaariaraluarmat.
