OQALLINNEQ Kikkut Naalakkersuisunngussappat?

Naalakkersuisunut ilaasortanngortussat saqqummiunneqarnissaat suli utaqqineqarpoq, KNR-ili paasitinneqarpoq tamanna aqagu pingasunngornermi pisussanngortoq.

Tamannalu pitinnagu kikkuussanersut eqqoriarsinnaavarput, aamma illit eqqoriaaqataasinnaavutit. Nunarput kikkunnit aqunneqassava? Kina aalisarnermut naalakkersuisunngussava? Inuussutissarsiornermut aatsitassanullu naalakkersuisuuffik kiap akisussaaffigissavaa?

Aamma atuaruk Naalakkersuisunut ilaasortat Kim Kielsenip aqagu saqqummiutissavai

Partiit Inatsisartunut qinigaasunik naalakkersuisunngortitsissappat imaluunniit nuimanerpaartatik Inatsisartuniitiinnarniarlugit qinigaanngitsunik naalakkersuisunngortitsissanerpat?

Naalakkersuisut siulii tassaapput aningaasaqarnermut naalakkersuisoq Vittus Qujaukitsoq (S), aalisarnermut, piniarnermut nunalerinermullu naalakkersuisoq Finn Karlsen (S), inuussutissarsiornermut aatsitassanullu naalakkersuisoq Jens-Erik Kirkegaard (S), ilaqutariinnut inatsisinillu atortitsinermut naalakkersuisoq Martha Lund Olsen (S), ineqarnermut naalakkersuisoq Siverth K. Heilmann (A), peqqissutsimut angallannermullu naalakkersuisoq Steen Lynge (A), ilinniartitaanermut, naligiissitaanermut kultureqarnermullu naalakkersuisoq Nick Nielsen (S), naalakkersuisullu siulittaasuat aamma nunanut allanut naalakkersuisuusoq, Aleqa Hammond.

Taakkunanilu Martha Lund Olsen Inatsisartunut qinigaaqqittutuaavoq. Taanna naalakkersuisutut ingerlaannassava? Aamma ilai naalakkersuinngoqqissappat?

Kim Kielsenip Naalakkersuisunut kikkut ilaasortanngornissaannik saqqummiussinissaata tungaanut eqqoriaasinnaavutit. Oqallinnerup torersumik nipilimmik ingerlannissaa eqqaamallugu.