Kiffartuussinissamut isumaqatigiissutissat ukiuni qulini atuutissasut

Ilaasunut angallassinermut assartuinermullu kiffartuussinissamut aappaagumit isumaqatigiissutissat ukiuni qulini atuutissapput.

AAMMA ATUARUK Ilinniarnertuunngorniaq juullisioreeruni utersinnaanngitsoq

Attaveqarnermut naalakkersuisoq, Karl Frederik Danielsen, Inatsisartut aningaasaqarnermut akileraartarnermullu ataatsimiititaliaanut taavalu aamma sanaartornermut ataatsimiititaliaannut taama siunnersuuteqarpoq.

- Maanna nutaassami isumaqatigiissutit naluneqanngitsutut ukiunut qulinut inissinneqartussaapput, attaveqarnermut naalakkersuiusoq, Karl Frederik Danielsen KNR-imut oqarpoq.

Suliariumannittussarsiunngitsoq

Naalakkersuisoq isumaqatigiinniarnissamut piginnaatitsissummik februaarimi tunineqarpoq.

Kiffartuussinissamut isumaqatigiissutissat kujataani, Qeqertarsuup Tunuani, Uummannap Upernaviullu eqqaani, Nuummit Maniitsumut Ittoqqortoormiiniillu Nerlerit inaannut atuutissapput. Taakkualu suliariumannittussarsiorsimanagit, naalakkersuisup nassuerutigaa.

- Neqeroortitsisoqanngilaq. Naalakkersuisunit akuersissutigineqarpoq, aningaasaqarnermut akileraartarnermullu ataatsimiititaliap tassanngaanniit suliaq pimoorullugu massakkut nalunngilara ingerlakkaat, Karl Frederik Danielsen oqarpoq.

Suliffeqarfinnut sorlernut isumaqatigiissutissatut siunnersuusiorsimanerluni ataatsimiititaliaq akuersitinnagu oqarusunngilaq.

Angalanissamut pilersaarutit isumaqatigiissutissatut siunnersuut ataatsimiititaliap akuereriarpagu saqqummiunneqassasut, naalakkersuisoq oqarpoq.

AAMMA ATUARUK Servicekontrakterne udløber: Oppositionen er utålmodig

Ukiortaamiilli angalanissamut billetimik pisiniaruit suli utaqqeqqittariaqassaatit. Qanoq sivisutigisumik utaqqinissat attaveqarnermut naalakkersuisup akisinnaanngilaa. Tassami kikkut angallassisuujumaarnersut, ataatsimiititaliaq akuersippat aatsaat saqqummiussinnaavaa.

- Aningaasaqarnermut akileraartarnermullu ataatsimiititaliap akuersissutigissappagu kikkut sumilu namminersortut assigiinngitsullu atorneqarniarnersut saqqummiunneqarumaarpoq, attaveqarnermut naalakkersuisoq, Karl Frederik Danielsen taama oqarpoq.