Knud Kristiansen: Kiffartuussinissamik isumaqatigiissutit pituttugaasumik isumaqatigiissutaapput
- Neqeroorut naggataasumik tunniunneqarmat taanna pituttuisuuvoq. Aamma suna tamarmi piffissaq kingulleq atorlugu allanngortinneqassaguni tupinnarpallaassaaq. Nunatsinni taanna takuneqarnikuungilaq ilimagineqarsinnaananilu, Knud Kristiansen aningaasaqarnermut akileraartarnermullu ataatsimiititaliaq isumasioqatigereerlugu oqarpoq.
Neqerooruteqarnerlu pituttuisuuguni kiffartuussinissamik isumaqatigiissut sooq atsiorneqarsimannginnersoq aperineqarami kiffartuussinissamik isumaqatigiissutit nutaat pissutsinik allanngortitsisut naalakkersuisoq akivoq.
- Pissutsit allanngulaarpata ukiorpassuarni kiffartuussisimasut naleqqussaallutillu aaqqissuisussaapput. Aamma taanna tupinnartuliaagunanngilaq. Soorlu Disko Linep akunneq tulleq angallassinermut pilersaarutit saqqummiunniarlugit ilimasaarutiginikuuaa. Taamaammat aamma tamakku pilersaarusiorlugit suliarinissaanut piffissaqartariaqarnikuupput. Aamma una aappaa allaanerunngilaq, Knud Kristiansen oqarpoq.
Angalasut aqqutissaaruppata
Angalasut illoqarfinni apuuffigisussaanngisaminni aqqutissaaruttut qanoq iliortassanersut kiffartuussinissamik isumaqatigiissutit saqqummiunneqarmatali nalornissutigineqarpoq.
Angalasullu aqqutissaaruttut akunnittarfinni unnuinermut billitsinullu akiliisariaqartannginnissaannut iluarsiissutissamik ujartuisoqartoq Knud Kristiansenip oqaatigaa.
- Kingusinnerpaarpaamik decembarimi taanna inissereersimassavarput. Maani sammisagut ilaatigut taakkuupput. Oqaatiginngikkaluarlugu kikkut, sumut qanorlu oqaluuserinerigut. Taakku oqaatigissallugit siusippallaarpoq. Kisianni qularnanngitsoq aajuna: Ajornartorsiutinngortussaq aaqqiiviginiarlugu maanna qaqilerititsivugut, Knud Kristiansen oqarpoq.
Demokraatit tapersersuisut
Aningaasaqarnermut akileraartarnermullu ataatsimiititaliaq kiffartuussinermik isumaqatigiissutinut tapiliussatut aningaasaliissutit pillugit suli isummersoqquneqanngikkaluartoq iluarsiissutissarsisoqassaqqaartoq Demokraatineersup Tillie Martinussenip qularinngilaa.
- Ajunnginnerusumik suliarineqarsinnaagaluarpoq. Kisianni angalasut kinguaattoortitaagunik akileerujussuartitaannginnissaannut aningaasanik immikkoortitsisoqarnissaa tapersersorparput, Tillie Martinussen oqarpoq.
