Kielsenip imaani plastikkinik eqqakkat tamanit iliuuseqarfigeqqugai
Plastikkinik eqqakkat nunatta imartaaniittut amerlanersaat nunatsinneersuupput. Tamannalu tunngavigalugu Kim Kielsenip nunatsinni innuttaasunut tamanut sukannersumik kaammattuutigaa eqqakkat imaanut pinnginnissaat qulakkeerniarlugu pitsaanerusumik iliuuseqaqqullugit.
Eqqagassalerinermut akisussaaffik kommuniniippoq, akisussaaffitsillu naammassisariaqarpaat, Kim Kielsen Qanoruumi ataasinngornermi unnukkut taama oqarpoq.
- Eqqaaveqarnermut tunngatillugu pilersaarut suliarineqartartussaavoq, taavalu tassani qanoq inerisarneqarnissaat sulissutigineqartariaqarpoq. Plastikkit allallu uterteqqinneqartarnissaat atoqqinneqartarnissaallu, taanna suliniut ingerlanneqartariaqarpoq, Kim Kielsen oqarpoq.
AAMMA ATUARUK Nunatta imartaani plastikkinik ulikkaartoq
Kommunilli kisimiillutik suliassaq naammassisinnaanngilaat. Kielsenip imaani eqqakkat ikilisarnissaannut nunatsinni innuttaasut aamma akisussaaffimmik tiguseqataanissaat kissaatigaa.
- Eqqaaveqarpugut. Maangaannaq eqqarnagit. Aamma pinngortitami arlaatigut siumoraangatsigit, tigusarlugit oqquttarlugit, eqqaavimmullu apuuttarlugit.
Aamma isumaqarpoq eqqakkanut tunngatillugu meeqqat inersimasunit eqqumaffigineqanerusariaqartut.
- Meeqqat arlaatigut iliuuseqarfigigaanni, arlaatigut siunnersoraanni, taakkua nikittarput. Aamma angajoqqaaminnut apuuttarpaat. Ilaatigullu uagut inersimasuusugut tusaaneq-ajorpagut, iliuuseqaannartarpugut, qangatut eqqaannartarlugit.
Suliffeqarfiit Kim Kielsenimit aamma sukannersumik kaammattorneqarput.
- Tamakkua poortuutissat allallu iluamik inaalittarnissaat, peeraangamikkit arlaatigut inaalittarnissaat eqqaavimmullu igillugit pitsaanerpaanermik inissillugit sulissutigineqartariaqarpoq.
Kim Kielsenip aamma oqaatigaa avatangiisinut aningaasaateqarfimmut inatsisitigut tunngavissat Naalakkersuisunit piareersarneqaleruttortut, tamannali qaqugu tusarniaassutigineqassanersoq ullulersinnaanngikkallarnerarpaa.
