Namminiilivinneq: Kielsenip Enoksenip takorluugai upperinngikkai
Siumut sapaatip akunnera kingulleq ataatsimeersuarmat partii nunatta namminiilivinnissaanik ulluliinissamik sulissuteqarnianngitsoq aalajangiunneqarpoq. Tungaviusumilli inatsimmik suliaqarneq utaqqiniarneqarpoq.
Tamannali naalakkersuisooqatigisamit Partii Naleqqamit iluarisimaarneqanngilaq, siulittaasummi Hans Enoksenip nunarput 2021-mi namminiilivitsikkusuppaa. Isornartorsiuinerli naalakkersuisut siulittaasuata, Kim Kielsenip eqqissisimasumik tiguaa.
- Hans Enoksenip 2021-mi namminiilivikkusunneranut imatut isumaqanngilanga, Kim Kielsen KNR-imut akissuteqarluni allappoq.
Isumaqalaarsinnaasorli Kielsenimmi ukiut sisamat naammassanersut KNR-imut akissuteqarnermini allappaa.
Tikisitanillu sulisukinnerunikkut aningaasarpassuit pissarsiarineqarsinnaasut taamaalillunilu nunarput danskit naalagaaffianit tapiissutinik pisariaqartitsissanngitsoq Enoksen isumaqarpoq.
- Taamaattumik taamatut sioralluni eqqarsaannarneq qimanneqartariaqarpoq, allannguisinnaakutsoorpugut, ullumikkorniit akikinnerujussuarmik ingerlatsisoqarsinnaalissaaq takusinnaasagut, Nanoq Mediamut oqarpoq.
AAMMA ATUARUK Enoksen ukiut sisamat qaangiuppata namminiilivikkusuttoq
Kielsenilli inuiaqatigiinni allannguuteqarujussuaqqaarluta aatsaat naalagaaffittut namminersulivissimasutullu tapiissutersinata ingerlasinnaasugut isumaqarpoq.
- Nunarput ukiut sisamat qaangiuppata namminiilivissimanissaa piviusorsiorneruguni piviusorsiunngikkuniluunniit qanoq piumasaqaateqarnissaq qanorlu akileerusunneq apeqqutaavoq. Namminiilivikkusukkutta inuiaqatigiinni pissutsit assigiinngitsut maannakkormiit pitsaanerusariaqarsoraakka. Uani ilinniartitaanerup inuussutissarsiornerullu ingeriartortinneqarnera ilaapput.
AAMMA ATUARUK Siumut namminiilivinnissamut aqqutissiuussissaaq
Taamaammat ukiunit sisamanit amerlanerusariaqartut Siumut siulittaasua oqarpoq.
- Takorluukkakka malillugit taakkunani ineriartortikkusutat ukiuni sisamanit amerlanerusuni ineriartortinneqassapput, Kielsen oqarpoq.
Enoksenip oqaaseqaatigisaanut iliuuseqarniarani Naalakkersuisut siulittaasuata KNR-imut akissuteqaammini oqaatigaa. Naalakkersuisullu ataatsimoorlutik tunngaviusumik inatsissaq pillugu isumalioqatigiissitap suliaqarnera utaqqeqqaarneqassasoq isumaqatigiissutiginikuugaat innersuussutigalugu.
AAMMA ATUARUK Nunatta namminiilivinnissaanut aningaasaqarneq apeqqutaassaaq
AAMMA ATUARUK Namminersulernermut aqqut akisuallaalersinnaavoq
AAMMA ATUARUK Selvstændighed på en ordentlig måde