Kim Kielsen Torersumik namminiilivikkiartorniartoq
Partiimi siulittaasunngorniuttut marluk, Vittus Qujaukitsoq aamma Kim Kielsen, malunnartumik assigiinngitsunik isumaqarput.
Unammillertaasoq, Qujaukitsoq, namminersortunngornissamut sukkanerusumik sulissasugut oqarpoq, siulittaasutut ingerlaqqittoq, Kim Kielsen, namminersortunngornissamut aamma isumataasuusoq, arriinnerusumik ingerlajumavoq.
AAMMA ATUARUK Kim Kielsen qinigaaqqippoq
Qaqugu naalagaaffinngornissap ullulernissaa partiip immikkoortortaqarfiini oqaluuserineqaqqaassasoq, aamma tunngaviusumik inatsisissamut isumalioqatigiisitap sulinera utaqqimaaqqaarumallugu, ataatsimeersuartut, ippassaq aalajangerput.
Tassalu namminersortunngornissamik suliaqarneq sukkatsisarneqassanngilaq:
- Ippassaq taanna aamma oqallisigineqarmat, amerlanerussuteqartut ullulinngilaat. Aamma taanna ataqqillugu, najoqqutaralugu, ingerlassaagut, Siumumi siulittaasutut qinigaaqqittoq, Naalakkersuisut siulittaasuat Kim Kielsen, KNR-ip radiukkut aallakaatitassiaanut, Aasaaneranimut oqarpoq.
Suna tamaat pilliutiginagu
Tassalu naalagaaffinngornissarput pillugu sulineq sukkanerulissanngilaq.
- Siumup anguniagaaniippoq. Kisianni torersumik, suna tamaat pilliutiginagu, naalagaaffinngornissarput anguniartuartussaavarput, Kim Kielsen oqarpoq.
Ulluliinissarli maanna sulissutigineqartoq, Kim Kielsenip oqaatigaa.
- Tunngaviusumik inatsisissamut ataatsimiititaliap sulinissaata takutissavaa uani suliami qaqugu qanorlu ingerlassanersugut, Kim Kielsen Aasaaneranumut oqarpoq.
Naalagaaffinngornissarput meeqqatsinnit ernutatsinnilluunniit ullulerneqarsinnaajumaartoq, Kim Kielsenip siornatigut oqaatigereerpaa.