Kim Kielsen: Siumut namminiilivinnissamut aqqutissiuussissaaq
KNR Kim Kielsenip angerlarsimaffianut Nuummi Nuutoqqamiittumut qaaqqusaavoq. Kim Kielsen illumi silataaniippoq, ilisimaneqarnermisullu aalisariarnissamut piareersimarpalaarluni sullisinik atikkersimalluni.
Kielsenip illuata silataani Erlasorput erfalavoq. Erfalasoq nungullarsimavoq, tamatumunngalu peqqutissaqarluarpoq.
- Erfalasorput ullut tamaasa erfalatittarparput, Naalakkersuisunut siulittaasuugallartillunga taamaattuaannassaaq, Kim Kielsen tulluusimaarluni oqarpoq.
Kimip illuminut tikilluaqquaatigut takornariartillutalu. Naqqup-iluani sullivimmi Kielsenip nulia puisip amianik ilaatigut taskissanik mersortartoq naapipparput.
Naqqup-iluani ingerlaqqeriaratta Kielsenip sulliavianut pivugut. Inimi tassani piniarnermut aalisarnermullu atortut assigiinngitsut soorlu allaasit, imassat, saviit ipittut, ningittakkat allarpassuillu takuneqarsinnaapput. Suut tamarmik piffissaq silalu atoruminarpat atorneqariataarnissaannut piareersimallutik inissitsiterluaqqapput.
- Pinngortitamiinnissaq pinngitsoorsinnaanngilara, Kim Kielsen oqarpoq.
Taama isumaqarnera illup initaanut iseriaratta uppernarsivarput. Pinngortitaminngaanneersunimmi uumasunik immikkanik, kalaallit eqqumiitsuliaannik, teriannissanik qalipakkanillu pinngortitamik assilialersukkanik pinnersarluarsimavoq.
- Naalakkersuisuulluni piumallerlunili pinngortitamukartoqarsinnaanngilaq. Taamaammat pinngortitamiissinnaanngikkuma taava pinngortitaq uagutsinnukaatissavara, Kielsen qungujulluni oqarpoq.
Kim Kielsen Naalakkersuisut siulittaasuattut ullormut suliassarpassuaqartarpoq. Siumumili Vittus Qujaukitsorlu siulittaasunngorniuunnissaminnut piareersarluarsimavoq.
- Piareersimavunga. Ernumassutissaqanngilanga, Kim Kielsen naatsumik erseqqissumillu oqarpoq.
Taassuma qineqqusaarnermi oqalugiaatissani KNR-imut saqqummiukkusunngilaa.
Qinigaaqqissagunili ataaseq qularnanngilaq. Tassa Siumumi ilaasortat kissaataasa piviusunngortinnissaanut nunattalu namminiilivinnissaanut sulissuteqarnissaq.
- Siumut namminiilivinnissamut siuttuulluni aqqutissiuussissaaq. Akornutaasut tamarmik piiassavagut, taamaalilluta meeqqatta ernuttattaluunniit namminiilivinnissaq ullulersinnaanngussavaat, Kielsen oqarpoq.
Kielseni namminiilivinnissarput nammineq ullulernianngilaa. Taanna naapertorlugu nunarput namminiilivissappat ajornartorsiutaasut aaqqiivigeqqaartariaqarpagut, assersuutigalugu isumaginninnermi ajornartorsiutit suliffissaaleqinerlu aaqqiivigineqaqqaartariaqarput.
- Qularinngilluinnarpara namminiilivikkumaartugut, inuiaqatigiinnili sanngiinnerusut pilliutigineqaratik nukittorsarneqaqqaassapput, Kim Kielsen misigissuseqarpalaarluni oqarpoq.
Inuit Kielsen paasinerluttarpaat
Kim Kielsen tusagassiutitigut takugaanni isumaluppasingajanngikkuni kamaqqarpasissinnaasarpoq. Tamannalu nassuiaatissaqarluartoq inuttaata oqaatigaa.
Piniartarnerpassuimisagooq kinguneranik siutimigut illuttut tusaasakinnerulersimavoq.
- Tassa tusaaniarsaralunga ilungersoraangama tamanna kiinnanni takuneqarsinnaasarpoq, tamatuma qiningasutut isikkoqartitarpaanga. Taamaammat ilaatigut nillianngikkaangama nipikippallaamik oqaluttarpunga assersuutigalugu oqalugiaraangama. Tusartaateqarnersunga apeqqutaasarput, Kielsen nassuiaavoq.
Siumup nuna tamakkerlugu ataatsimeersuarnera pingasunngorpat aallarnerneqassaaq, tassanilu Kim Kielsenip partiimi siulittaasuusini ingerlatiinnarniarsarissavaa. Ataatsimeersuarnerup siulittaasunngorniuunnertaa sisamanngorpat pissaaq. Tassani KNR Sisimiuni najuulluni malinnaatitsissaaq.