Kim Kielsen angorusutani anguniarlugu Imarsiornermik Ilinniarfimmi Nuummiittumi ukiup affaa ilinniarpoq.Assi: Arnaq Nielsen // KNR

Kielsen ilinniartoq: - Nuanneqaaq

Kim Kielsenip inuusuttuullunili pilerigisani naammassinialerpaa. KNR-ip Naalakkersuisut siulittaasorisimasaat, maanna aqumiutut ilinniartoq, naapippaa.

Naalakkersuisut aamma Siumup siulittaasorisimasaa, Kim Kielsen, Inatsisartunit novembarip 30-ata tungaanut sulinngiffeqarpoq.

Taassumami inuusuttuullunili angorusuttakkaminut ukiaq manna atorniarlugu aalajangersimavoq, taamaaliormigut inuunermini kapitali ammajuaannartoq matuniaramiuk.

Tassalu umiarsuarmi aqumiutut ilinniarsimasutut allagartaqalernissani. 

- Tassa imaappoq qamuuna naammassisassara aajuna naammassinialerpara. Inuunerma ingerlanerani qupperneq taanna ammajuaannartoq massakkut decembarimi angusissaguma matussooq, oqaluttuarpoq.

Angorusutarli taanna anguniarlugu Imarsiornermik Ilinniarfimmi Nuummiittumi ukiup affaa ilinniartariaqarpoq.

 

Imarsiornermik Ilinniarfimmi ilinniartitsisoq Eydun Berth Jacobsen, umiarsuarni aalisariutini 3. gradimik aqumiunngorniartunut umiarsuarni teknik pillugu ullaatungaa ilinniartitsileruttortoq KNR-imit Kim Kielsen ilinniarfiani naapipparput.

- Imerpalasut tankimiittut ilaannakunngoraangamik qanoq umiarsuarmut makittarissusaanut sunniuteqarsinnaaneri sammivagut, Kim Kielsen oqaluttuarpoq.

Qanoq ippa ilinniartuulluni?

- Nuanneqaaq. Tassa nuannerpoq. Paasissutissat allarluinnaat. Ulluinnarni politikeritut inuuneq allanngorpoq. Politiitut inuuneq allanngorpoq. Massakkut ilinniagassat allat sammillugit, Kim Kielsen politiitut ilinniarsimasoq oqarpoq. 

Inuusuttuullunili angorusutaa

Politiitulli ilinniarsimanera, 1992-imi ilinniarlugu aallartitaa, ilinniagassatut siullertut kissaatigisimanngilaa.

Taamanilimi aqumiutut ilinniarusussimavoq.

- Qangali aalajangiunnikuugaluarpara, oqaluttuarpoq.

Kim Kielsenimmi meeqqat atuarfiat naammassigamiuk Danmarkimi tissiartaammi Skoleskib Danmarkimi tunngaviusumik ilinniarnikuuvoq. Tamatuma kingorna Danmarkimi aamma umiarsuarmi naalaganngorniartussaagaluarluni.

Aammami ilinnialernissaminut akuerineqareersimagaluarpoq.

Kisianni taamaattoqanngilaq.

Taamani 1992-imi.

 

Taamanimi Namminersornerullutik Oqartussanit piumasaqaataavoq ilaquttat ilinniariarnermi ilaginiaraanni nuunnerannut nammineq akiliuteqarnissaq. Taamaaliorusussimanngilarlu. Taarsiullugu politeeqarfimmut isersimavoq aperalunilu ilinniartunngorsinnaanerluni.

Kusanaatsuliap periarfissaq nutaaq qatangiinnartikkaa

Aqumiutut ilinniarniarluni nutaamik 2013-imi periarfissaqaleraluarpoq. 

- Aleqa Hammondip nalaani, taamani Naalakkersuisunut Siumumullu siulittaasuugallarmat, Inatsisartuujutigalunga eqqarsaatigigaluarakku atuarujuussallunga, oqaluttarpoq.

- Taakkua sammillugit, taava allagartartaarlunga tassuuna.

Kielsenilli 2013-imi ilinnialernissaminut pilersaarutini unitsiinnartariaqarnikuuai Aleqa Hammond paarlakkamiuk.

Tamanna pivoq Aleqa Hammondip nunatta karsianit inuttut atugassaminik atuisarsimanera saqqummermat.

 

Taamanimi Naalakkersuisut aamma Siumup siulittaasuatut tunuarpoq.

Taamaalilluni Kielsenip aqumiutut ilinnialerniarluni pilersaaruteqarnerigalua aappassaanik qatangiinnarpoq.

- Tassanngaannaq nikittoqarpoq. Naalakkersuisut siulittaasunngorallarpunga. Taava kingornatigut naalakkersuisut siulittaasunngorlunga. Inuuneq allanngorpoq taamanikkut, soorlu massakkut aamma inuuneq allanngortoq.

Ilinniaqatai tupaallattut

Kielsen Imarsiornermik Ilinniarfimmi arfineq-pingasunik ilinniaqateqarpoq. Inuusuttuunerusut.

Ilinniaqataasalu paasigamikku ilinniaqatigilertussaallugu tupaallassimapput.

- Atuaqatigisussanngorlugu takullugu tupannalaarpoq, ilinniaqataa Eli Poulsen, oqaluttuarpoq.

- Ilimananngeruttorluni Naalakkersuisut siulittaasuat atuaqatigissallugu, oqarpoq.

Naalli Naalakkersuisuni siulittaasuusimagaluarluni ilinniartunit allanit allaanerunngitsoq ilinniartitsisua oqaluttuarpoq.

- Tamanna eqqarsaatigineq ajorpara. Aammami Kim siuliatigut naapereernikuugakku nalunngilaarlugulu. Ilinniartutut allatulli iinnarpoq, Eydun Berth Jacobsen oqarpoq. 

Naalakkersuisulli siulittaasorisimasaanik ilinniartoqarneq ulluinnarsiutaanngimmat alutorsartarpoq.

- Allat oqaluttuuttarpakka naalakkersuisuni siulittaasuusimasoq ilinniartuutigalugu, Eydun Berth Jacobsen oqaluttuarpoq. 

Kielsen: Uteqqissaanga

Inatsisartunut qinersinermi kingullermi Kim Kielsen 1845-init qinerneqarpoq - Siumup siulittaasuanit Erik Jensenimit 1186-init taaneqartumit qinerneqarnerulluni. 

- Tassa juullilerpat naammassissuugut. Taava taanna atuagaq ammaannartoq qamaniittoq matussooq, oqarpoq.

- Taava orlovernera novembarip 30-anut killeqarpoq. Ulloq taanna qinikkatut uteqqittussaavunga.

 

Kielsen siunissami politikkikkut suliinnassanersoq qinersisartut aalajangissagaat inuttaata oqaatigaa.

Nuna aqukkusunneruiuk, imaluunniit angallatini aqukkusunneruit?

- Kiffaanngissuseq assigiinngitsunut inissinneqarsinnaavoq. Nunamik aqutsineq, imaluunniit umiarsuarmik ingerlatsineq, imaluunniit angallammik. Tassaniipput tamarmik.

Illimmi sorusunneruit?

- Uanga, aajuna massakkut naammassiniagara. Naammassisassara, taanna matunissaa. Suli soraarummiinngilagut. Suli misilitsinngilagut. Taamaammat nalunaqaaq, Kim angusissanersoq. Naluara, akivoq.

Kielsen ilinniaqataalu aqumiunngorniarlutik juulip naalernerani aallartipput.

Kim Kielsen ilinniarnermini angusissaguni decembarip 17-iani naggataassaaq.

Sulinngiffeqarneralu novembarip 30-ani, ullormi 55-iliiffissaani naassalluni. Inuttaata ilanngullugu oqaatigaa, sulinngiffeqareeruni qinigaaffik tamaat Inatsisartuni sulissalluni.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat