Kielsen: IA-p isornartorsiuinera asuliinnaq oqarluartaarneruvoq
Inuit Ataqatigiinneersut taakku marluk, Naalakkersuisuugallartut siulittaasuat ilaatigut partiit siulittaasuinik Inatsisartunut ilaasortaanngitsunik nunatta ingerlanneqarnera pillugu ataatsimiinnernut aggersaanermigut malittarisassanik saneqqutsinerarlugu sapaatit-akunnerata siuliani isornartorsiorpaat.
AAMMA ATUARUK IA: Naalakkersuisuugallartut uiverput
Peqatigitillugu naalakkersuisuugallartut sinerissap qanittuanut sinerissallu avataanut kaammattuutigineqartut qissimingaarnagit saattuartassiissutinik agguaasseqqissimanerat aamma isornartorsiorpaat. Taamatut iliorneq uumassusilinnik ilisimatuut kaammattuuttaannut naapertuutinngilaq, aalisarnermulli, piniarnermut nunalerinermullu naalakkersuisoqarfimmi nalinginnaasumik suleriaaserineqartoq malinneqarsimalluni.
Kim Kielsenip suleriaatsimik allanngortitsissalluni erseqqissarpaa, partiillu siulittaasui siunissami ilanngutitittassannginnerarlugit.
- Ulluinnarni suliamik ingerlatsinerup politikkikkullu saqitsaannerit qineqqusaarnerlu immikkoortinneqarsinnaasimanngippata, inatsisini siunertaasut allatut isumagisariaqassavakka, naalakkersuisuugallartunut siulittaasoq taama allappoq.
