Kielsen ammaassiartoqqinneq pillugu: Malittarisassat malinnissaannut tamatta akisussaaffeqarpugut
Nunatta ammariartuaaqqinneranut immikkoortoq siulleq ataasinngorpat aallartissaaq.
Naalakkersuisut siulittaasuata, Kim Kielsenip tamanna tusagassiortunut tallimanngornermi ualikkut katersortitsinermi aalajangersumik oqaatigaa.
Tassa inuit amerlanerpaamik 600-it nunatsinnut tikissinnaalernerannik tamanna kinguneqassaaq.
- Aammaasseqqikkiartuaarnermut atatillugu tamatta akisussaaffeqarpugut. Peqqinnissaqarfiit innersuussutaat tikittunullu malittarisassiaat malinneqassapput angerlarsimaffimmilu matusimanissaq attanneqassalluni, Kim Kielsen oqarpoq.
AAMMA ATUARUK Tamaat isigalugu: Coronavirus pillugu killiffik
Nunatsinnut angalasussat aallannginnerminit misissortissimassapput, tunillatsissimannginnerminnullu uppernarsaammik takussutissiisinnaassallutik. Aammattaaq Sumut-immersuiffissaq sumukalernermik oqaluttuartoq immersorsimassavaat.
Nunatsinnullu tikittut angerlarsimaffimminnut toqqaannartumik mattukkiartortassapput. Tikinnermiillu ullut tallimat qaangiussimalerneranni misissorteqqissallutik, aatsaallu tunillatsissimanngitsutut uppernarsarneqarunik mattusimajunnaassapput.
Ilaasoqarnerunera ilimanaateqarnerusitsissasoq
Nunatsinni coronavirusimik tunillatsissinnikuusimasut katillugit 13-iupput. Maannali tunilaltsissimasutut uppernarsarneqarsimasunik soqanngilaq.
Timmisartulli angalanerulerunik, nunatsinnullu tikittut amerlanerulerunik coronavirusimik tunillatsissimasunik tikittoqaqqinnissaa ilimanaateqarnerulissaaq.
AAMMA ATUARUK Coronamik tunillatsissimasut marluk peqqissisut: Nunatsinni viruseqartoqanngilaq
Immitsinnut mianersuutissasugut, Kim Kielsen erseqqissaavoq
- Taamaaliornissarput pingaaruteqarluinnarpoq. Akisussaaffimmik tigusisariaqarpugut. Danmarkimiit tikittut arpalluta eqikkiartuinnarsinnaanngilagut.
- Nunatsinni innuttaasut maannamut minaersorluarsimapput, ammaaqqikkiartornermullu atatillugu aamma ikioqatigiittariaqarpugut, siulittaasoq oqarpoq.
Immikkoortut aappaat
Nunatta ammariartuaarnera immikkoortunut pingasunut avinnikuuvoq, immikoortoq siulleq ataasinngorpat aallartissaaq. Oqartussat tamatuma kingorna immikkoortup aappaata qaqugu aallartinneqarnissaa aalajangiiffigiumaarpaat.
- Danmarkmi tuniluuttoqarnera qanoq innersoq takussavarput, tamanna immikkoortup aappaanik qaqugu aallartitsissanersut aalajangiisuussaaq, Naalakkersuisut siulittaasuat oqarpoq.
- Ullut 14-it siulliit qanoq innersoq takoqqaalaassavarput, taanna oqarpoq.