Kiassaatip ajoquteqarnera Nuummi quersuarmi ikuallassutaasoq
Usisaatip Nuummi qullersaqarfittaavata apriilip ulluisa 20-anni ikuallannerani pinerluttoqarsimanngilaq.
Kalaallit Nunaanni Politiit taama paasissutissiipput.
Kiassaatip ajortissimanera ikuallalertoqarneranik kinguneqarpoq.
Danmarkimi ikuallannermik misissueqqissaartartut marluk Dansk Brand- og Sikringsteknisk Instituttimeersut tallimanngorneq arfininngornerlu apriilip ulluisa 23-at 24-allu misissuipput.
AAMMA ATUARUK Politiit ikuallattumik misissueqqissaarnissanut danskinit ikiorneqartut
Quersuarmilu kiassarnermut atortup innaallagiatigut ajoqusersimanera ikuallattuussutaasimanissaa ilimanarluinnartoq taakku misissuinerminni inerniliissutigaat.
Innerit kiassarnermut atortumik siaruaattut
Innaallagiatigut ajoqusersimanera atortorissaarutip ikuallajasortaanut ikummartitsivoq, ikuallannerlu taamaalilluni siammaalluni.
Taammaammat ikuallattoqarneranik misissueqqissaartartut teknikkikkut ajutoortoqarnera ikuallalersitsisuusutut nalilerpaat, tamannalu politiit ilisimannittunik apersuinerannut naapertuuppoq.
AAMMA ATUARUK Usisaat illorsuarmi ikuallanneq pillugu: Atuisartunut kinguneqassanngilaq
Allatut oqaatigalugu Kalaallit Nunaanni Politiit ikuallattoqarneranut atatillugu pinerluttuliortoqarsimaneraanissamut tunngavissaqanngillat.
Politiit ikuallattoqarnera pillugu apriilip ulluisa 20-anni nalunaaqutaq unnukkut qulingiluanut nalunaarfigineqarput. Ikuallanneq qatserisartunit unnuap qeqqata missaani qaminneqarpoq.
Usisaatip illorsuartaava Nuummi Iggiaata umiarsualiviullu akornanniittoq marlunngornermi unnukkut ikuallappoq. Taassumalu quersuartut nutaatut atulerneqarnissaa ilaatigut pilersaarutaavoq.