Usisaat illorsuarmi ikuallanneq pillugu: Atuisartunut kinguneqassanngilaq

 Usisaatip illorsuartaava Nuummi Iggiaata umiarsualiviullu akornanniittoq marlunngornermi unnukkut ikuallappoq.

Ikuallattoqarnerani ajoqusertoqanngilaq, ikuallattoqarneranullu pissutaasoq politiinit maanna misissuiffigineqaleruttorpoq.

- Attortisimaqaagut. Misissueqqissaartoqarnera maanna utaqqivarput, sanaartornerput qanoq kinguaattoortiginersoq maanna takussavarput, Usisaammi pisortaq, Arnannguaq Gerstrøm oqarpoq.

Illorsuaq ikuallanneranit qanoq innarlerneqartigisimanersoq suli ilisimaneqanngilaq. Arnannguaq Gernstrømilli oqarnera naapertorlugu Usisaatip ingerlatsinera susoqarsimanngitsutulli ingerlaannassaaq. Suliffeqarfik Industrivejimi illuuteqarpoq, illorsuarlu ikuallattoq suli atulernikuunani.

AAMMA ATUARUK Nuummi ikuallanneq: Paasiniaaneq maanna aallartilerpoq

- Atuisartugut – Danmarkimiittut Kalaallit Nunaanniittulluunniit sunnerneqarnavianngitsoq oqaatigissallugu pingaaruteqarpoq. Nuummi sisamanik toqqorsiveqarpugut, pisortaq oqarpoq.

Illorsuup nutaap qaqugu atorneqarsinnaalernissaanut piffissaq qanoq sivisutigissanersoq suli ilisimaneqanngilaq.

Arnannguaq Gernstrøm maanna Danmarkimiippoq – ilaqutaali sinneri aamma piginneqataasut nunatsinniipput.

- Ajuusaarnalaarpoq. Ilaquttakkali sinneri nunatsinniipput, ikioqatigiippugullu. Immitsinnut oqarasuaatikkut Messengerikkullu sianerfigisariiaannaavugut, pisortaq oqarpoq.

AAMMA ATUARUK Kraftig røgudvikling ved brand i Nuuk: Politiet beder folk holde afstand

Politiit ikuallattoqarneranik ippassaq unnukkut nalunaaqutaq 21-p kingorna nalunaarfigineqarput. Qatserisartullu ikuallattoqarneranik unnuap qeqqata missaani qamitsillutik.

Politiit oqarnerat naapertorlugu illorsuaq marlunnut avissimavoq, illorsuullu avannarpasinnertaaniittoq ikuallalluni.

Ikuallattoqarneranit pujornera pissutigalugu inuit piffimmut qanillissanngitsoq politiit marlunngornermi unnukkut kaammattuutigaat.

Ikuallattumiillu ulorianartumik pujuliortoqarsinnaanera pissutigalugu piffiup eqqaani najugaqartut illup iluaniiginnarlutik igalaanik matoqqatitsinissaannik aamma piumaffigineqarput.