Kattusseqatigiit akitsuuteqanngitsunut ujariatsipput
Imigassanik cigarette-nillu kartoninik Nunatsinnut eqqusseqqusiunnaarnermit ukioq ataaeq qaangiuppoq.
Maanna Kattusseqatigiit Partiianneersoq Knud Fleischer isumaqalerpoq akitsuuteqanngitsunik Nunatsinnut eqqussisinnaaleqqittariaqartugut.
- Nunatsinni angallannikkut billitsit taama akisoreertingisut iluaqutissartaanik, tassalu nioqqutissanik akitsuuteqanngitsunik pisisinnaanermut periarfissanik, atorunnaarsitsineq malunnarmat siunertamisut kinguneqanngitsoq. Tamatuma periarfissap eqquteqqinneqarsinnaanera paaserusupparput, Knud Fleischer siunnersuumminik tunngavilersuivoq.
Akitsuuteqanngitsunik eqqussisinnaaleqqinnissaq Naalakkersuisut isumaqatigineraat paragraf 37 naapertorlugu apeqquteqarnermigut paaserusuppaa.
Akitsuuteqanngitsunik eqqusseqqusiunnaarneq aalajangiunneqarpoq Palle Christiansen Demokratineersoq Aningaasanut Naalakkersuisuutillugu. Taassuma taamanikkut naatsorsuutigaa imigassanik tupanillu akitsuusigaanngitsunik eqqusseqqusiunnaarnikkut landskarsip pisiniarfiillu isertitaat amerlineqarsinnaasut.
Akileraartarnermut aqutsisoqarfik juulli sioqqutilaarlugu KNR-imut nalunaarpoq eqqusseqqusiunnaarneq ukiortaariitsiarpaat nalilersuiffigineqarumaartoq.