Kattuffiit ataatsimoorlutik pisortanut naammagittaalliorput

novembarip 26-at 2004 10:46

Kattuffiit arlallit, ilaatigut Sulinermik Inuussutissarsiuteqartut Kattuffiat, Ilinniartitsisut, atorfillit peqqissaasullu kattuffii Aningaasaqarnermut Pisortaqarfimmut ataatsimoorlutik naammagittaalliuuteqarsimapput, naammagittaalliornermullu pissutaatinneqarpoq, atorfillit akiliunneqarlutik nuussinnaanerannut angerlarsinnaanerannullu maleruagassat paasineqarsinnaanerannik Namminersornerullutik Oqartussat allanngortitsiniarsimanerat.

Namminersornerullutik Oqartussat isumaqatigiinniartarfiata kattuffinnut nalunaarutigisimavaa, atorfillit ineqartitaasut assersuutigalugu piginneqatigiilluni illuutileqatigiinnut nuukkaangata akiliunneqarlutik angerlarsinnaatitaanerat apeqqusersimallugu.

Aningaasaqarnermut pisortaqarfimmi pisortaq Peter Beck ilisimatitsisimavoq, apeqqummut tamatumunnga naalakkersuisut aalajangersaasuusariaqartut imaanngitsorlu kattuffiit Namminersornerullutillu Oqartussat.

Kattuffiit naammagittaalliutigaat, kattuffiit siulliullugit oqaloqatigineqarsimanngimmata kiisalu suleqatigiilluni ajornartorsiutinik aaqqiiniartoqarnani naalakkersuisut matumani aalajangersaatinneqartussanngormata.