Karl-Kristian Kruse ilisarinngisaminit nakuuserfigineqartoq

Karl-Kristian Kruse sissamit aqqusinersuakkut qummukaartilluni arfininngornermi ualikkut nalunaaqutaq sisamanngulersoq saassunneqarpoq, saassunneqarnerullu kingorninngua politiinut nalunaaruteqarsimalluni KNR-imut oqaluttuaraa.  

- Ippassaq ualikkut sissamit qummarkaartillunga nalusannit tassanngaannaq tillunneqarpunga, pisullu kinguninngua politiinut nalunaaruteqarlunga, Karl-Kristian Kruse oqarpoq.
Suliarlu politiinut nalunaarutigineqareermat annerusumik oqaaseqarniarani, Karl-Kristian Kruse KNR-imut sapaammi ualikkut oqarpoq. 

Karl-Kristian Krusemut saassussisoqarsimanera pillugu politiit uppernarsarpaat.

- Karl-Kristian Krusemut saassussisoqarsimanera pillugu politiinut nalunaarutiginnittoqarsimasoq uppernarsarsinnaavarput. Angut saassussisoq inunnut allanut marlunnut nalaatsornikkut aamma saassussisimavoq, Politiit pingaartuisa pisortaat, Aqqaluk Petersen KNR-imut oqarpoq.

Saassussisimasutut pasineqartoq tigusarineqarsimavoq kingornali iperagaalluni. Saassussisorli inunnut pingasunut nakuusersimasutut kingusinnerusukkut unnerluutigineqassaaq. Nakuuserfigineqartullu politiinit aamma oqaloqatigineqareersimasut, Aqqaluk Petersen oqarpoq.

Krusep saassunneqarnera politikkikkut tunngaveqarsinnaaneranik paasissutissaqanngilaq. Tamannali eqqumaffigineqartoq, Aqqaluk Petersen oqarpoq.

Politiit naapertorlugit angut saassussisoq aalakuungaatsimasoq nalunaarutigineqarpoq.