Karl-Henrik Simonsen KNR-imi pisortanngussaaq

Tele-Postimi sulisoqarnermut maannakkut pisortaq 57-inik ukiulik Karl-Henrik Simonsen, KNR-imi ukioq manna apriilip aallaqqaataani pisortanngussaaq. KNR-imi siulersuisut siulittaasuat Nukâraq Eugenius taama nalunaaruteqarpoq.
Allattoq Mads Lynge
januaarip 04-at 2016 13:34

Tassa Karl-Henrik Simonsen, apriilip aallaqqaataani atorfinittussanngorlugu pisortassatut nutaatut isumaqatigiissusiorfigineqarsimasoq nalunaarutigineqarpoq:

- Siulersuisuni Karl-Henrik Simonsenip KNR-ip pisortassaatut atorfinitsinneratigut qilanaarpugut KNR-imi piorsaanerup ingerlateqqinnissaanut, siulersuisuni siulittaasoq Nukâraq Eugenius ilisimatitsivoq imalu nangilluni:

- Siulersuisuni isumaqarpugut Karl-Henrik Simonsen inuk taannaasoq KNR-imi pisortatut suliassamik kivitsisinnaasoqm, aammalu taannaasoq kalaallit eqqarsartariaasiat kulturiallu tunuliaqutaralugu KNR-ip ineriartortinnerani siuttuusinnaasoq. Inuiaqatigiinni inuussutissarsiornikkut ingerlaneq nalunngilluarpaa nunarsuarmilu avatangiisitsinni pisunut malinnaanermigut KNR-ip inuiaqatigiinnut kalaallinut tusagassiornikkut pitsaanerpaamik kiffartuussiuarnissaa isumagissallugu, Nukâraq Eugenius taama oqarpoq.

Karl-Henrik Simonsen Tele-Postimi sulisoqarnermut pisortatut 2006-imili atorfeqarpoq. Karl-Henrik Simonsen politiit iluanni ukiorpassuarni aamma sulisimavoq, qimannissaatalu tungaanut politiinspektøriulluni.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk