Kapisillit Savalimmiuneersut russinit piumaneqaqaat
Savalimmiut Kalaallillu Nunaata EU-mut ilaasortaannginnerisa pilersitaanik tamanna pissuteqarluni. Savalimmiormiunillu tamanna isumalluarfigineqaqaaq.
Russit inuussutissanik atuisut kapisilinnik mamarisaqarluartuupput. Ruslandimilu inuuniarnerup maanna pitsaaneruleriartornerata pilersitaanik, russit pisisinnaassusaat annertusiartuinnavilluni, aamma kapisilinnik piserusussusaat annertunerulerluni.
- Kapisilinnik Ruslandimut niueruteqarnerput maanna pitsaanerulerpoq. Savalimmiuni kapisilinnik tunisassiorfiit aannersaanni, Bakka Frostimi pisortaq, Regin Jakobsen taama oqarpoq.
Kapisillit 144.000 tonsit
Kapisillit 144.000 tonsit nunanit allaneersut, Ruslandimit siorna pisiarineqarput. Savalimmiuni kapisilinnik tunisassaiortup, Bakka Frostip taakku 6 procentii taamaallaat Ruslandimut tunisassiarigaluarai, taamaattoq aalisakkeriviup pisortaata siunissaq isumalluarfigaa.
Kapisillit Ruslandimit pisiarineqartartut 144.000-usut, 80 procentii Norgemit tunisassiarineqartaraluarput, Norgelli EU-p Ruslandimut inuussutissanik eqqusseqqusiunnaarneranut tapersersuinerani tamanna maanna unitsinneqarluni. Tassalu tamannarpiaq pissutaalluni, kapisillit Savalimmiunit tunisassiarineqartartut akii maanna qaffariaannaallutik. Savalimmiuni kapisilinnik tunisassiorfiup, Bakka Frostip pisortaa, Regin Jakobsen taama naliliivoq.
- Ruslandimi kapisilinnik piserusunnerulernerup kinguneranik, kapisilinnik niuerneq allaanerulersussaavoq, akillu qaffannerannik tamanna kinguneqarsinnaalluni, Regin Jakobsen oqarpoq.
Kapisillit 60.000 tonsit Savalimmiuni ukiumut tunisassiarineqartarput.
AAMMA ATUARUK Nioqqutissanik eqqusseqqusaajunnaarnermit Nunarput eqqugaanavianngilaq
Ruslandip inuussutissanik nunanit allaneersunit eqqusseqqusiunnaarnerani Royal Greenlandip eqqorneqannginnissaa suli iluamik uppernarsineqanngikkaluartoq, Royal Greenlandip Ruslandimut tunisassiaqartarnera aningaasatigut pitsaanerulissasoq, aalisakkanik suliffissuaqarfiup tuniniaanermut pisortaata, Bruno Olesenip ilimagaa. Aamma ilimagalugu raajat qalipaajarneqanngitsut tunisaallualernissaat, tassami canadamiut, Royal Greenlandip annermik unammillertigisaat, russinut pillaanermut peqataammata.
Royal Greenlandip tunisassiorneranut iluaqutaasinnaavoq
- Russit inuussutissanik nunanit allaneersunik eqqusseqqusiunnaarneranni, Kalaallit Nunaat eqqorneqatussaassagunanngilaq, tamannalu Royal Greenlandip tunisassiorneranut iluaqutaalluarsinnaavoq.
- Nunanulli allanut tunisassiornerput eqqorneqariannaavoq, tassami canadamiut tunisassiaminnik niueruteqarnissaminnik nunanik allanik isumaqatigiinniarsinnaalluarmata, Royal Greenlandip tunisassiornermut pisortaa, Bruno Olesen, Danmarks Radiomut oqarpoq.
Kalaallit Nunaat aamma Savalimmiut EU-mut ilaasortaannginnerisa pilersippa, russit inuussutissanik nunanit allaneersunit eqqusseqqusiunnaarnerannik eqqorneqannginneri. Norge EU-mut ilaasortaanngikkaluarluni eqqusseqqusiunnaarnermik tapersersuinertik pillugu, Ruslandimut eqqusseqqusiunnaartunut ilaapput. Danmarks Radio taama paasissutissiivoq.