Nioqqutissanik eqqusseqqusaajunnaarnermit Nunarput eqqugaanavianngilaq
Royal Greenlandip tuniniaanermut pisortaa Bruno Olesen taama oqarpoq, Danmarkip nunanut allanut tunngasunut ministereqarfia, russillu pisortatigoortumik nittartagaasa ilaanni tamanna aamma paasinarsivoq, tassa nioqqutissat Kalaallit Nunaanneersut Savalimmiuneersullu EU-mut eqqunneqarsinnaassapput, nioqqutissalli Danmarkip sinneraneersut Ruslandimut eqquteqqusaajunnaarnikuullutik:
- Nioqqutissat Danmarkimeersuunersut, Kalaallilli Nunaanneersuunersut Savalimmiuneersuunersulluunniit, Ruslandimi oqartussat misissortaraat paasivarput.
- Ruslandillu nioqqutissanik Kalaallit Nunaanneersunik Savalimmiuneersunillu eqqussisinnaavoq, taamaammat Ruslandip EU-mut iliuuseqarnera Nunatsinnut sunniuteqarnavianngilaq, Royal Greenlandip tuniniaanermut pisortaa Bruno Olesen oqarpoq.
Ruslandimut tunisassiorsinnaaneq pingaaruteqarpoq
Polar Seafood, 300 millionit koruunit nalinginut Ruslandimut tunisaqartarpoq, Royal Greenlandilu 100 millionit koruunit missaannik nalilinnik tunisaqartarluni. Ruslandimut tunisassiorsinnaanissaq taamaammat pingaaruteqartoq, Bruno Olesenip oqaatigaa:
- Ruslandimut tunisassiorsinnaanerup suli periarfissaanera soorunami pingaaruteqarpoq.
- Imaanngilaq Ruslandimut tunisaqarsinnaannginnerput tunisassiornitsinnut ataatsimut isigalugu ernumanartoqartoq, raajalli nunarsuarmi niuffaffinni akii aamma eqqarsaatigineqartariaqarput.
- Tassami Ruslandi uagutsinnut aamma matoqqasimasuuppat, raajat Ruslandimut tunisassiarisassaagaluavut nunanut allanut tunisariaqarsimassagaluarpavut, tassungalu atatillugu unammillerteqassagaluarpugut, akinullu tamanna sunniuteqassagaluarluni, Bruno Olesen oqarpoq.
Unammillertit Ruslandimut tunisisinnaanngillat
Royal Greenlandip Polar Seafoodillu unammillertaat arlallit Ruslandimut tunisisinnaanissamut maanna periarfissaaruteqqapput, tamannali Nunatta raajanik avammut tunisassiorneranut qanoq sunniuteqassanersoq suli oqaatigineqarsinnaanngitsoq, Royal Greenlandip tuniniaanermut pisortaata oqaatigaa:
- Naliliinissamut siusippallaarpoq. Niuffaffinni pissutsit annertunerusumik ilisimasaqarfigeqqaartariaqarpavut, pissutsilli uagutsinnut ajoqutaanavianngitsut isumaqarpunga, Royal Greenlandip tuniniaanermut pisortaa Bruno Olesen oqarpoq.
