VIDEO KANUKOKA Kommuneqarfik Sermersoorlu avinniarput
Kommunimi averusernissamut atsioreerput. KANUKOKA-lu soqutigisanut illersuisimanngitsutut nalilerpaat, avissaavinnissarlu januaarip aallaqqaataaniit atuutilertussatut aalajangiusimavaat.
- Pakatsinarsimavoq aamma soorunami ilaasortaaffigisinnaanngilarput peqatigiiffik uagutsinnut illersuinngippat, Kommuneqarfik Sermersuup borgmesteria, Asii Chemnitz Narup, KNR-imut oqarpoq.
Aamma atuaruk Asii: Kommuneqarfik Sermersuumi ernumasoqanngilaq
Avissaarnermi annaasasat kommunimut amerlassasut, KANUKOKA naliliivoq, annaasassallu tulleriiaarlugit allaaseraat.
- Immaqa iluatigeqqusaarnermik taaneqarsinnaanngilaq. Sermersuumut saaffiginnippugut eqqarsaqqeqqullugit kisianni nalunngilluinnarparput nammineq aalajangigassarigaat, KANUKOKA-mi siulittaasoq, Palle Jerimiassen, KNR-imut oqarpoq.
Sermersuup KANUKOKA-mut ilaasortaanerminut ukiumut 4, 2 million koruuninik akiliisarpoq. KANUKOKA-miillu aninermi kattuffimmiit siunnersortinnissamut periarfissat annaaneqassasut, kattuffimmiit tikkuarneqarpoq, aammali kommunimut ataatsimoortumik tapiissutissanik isumaqatigiinniarnermi kommunip sunneeqataasinnaanissani annaassagaa, KANUKOKA naliliivoq.
Aamma atuaruk Palle Sermersuumut: Ilaasortaaginnaritsi
Massakkumulli piumasatigut angusatigullu sunneeqataasinnaanertik Sermersuumiit naammaginngereerpaat.
- Uagut qasseriarluta kissaatigisimavarput aalajangiisoqassatillugu KANUKOKAmi isumaqatigeeqqissaarluni allorissaaqatigeeqqissaarluni aalajangertoqartassasoq minnerunngitsumik kommuninut innuttaasunullu annertuumik kinguneqartussanik aalajangiisoqassatillugu, Kommuneqarfik Sermersuup borgmesteria oqarpoq
- Isumaqarpunga uanga annertuumik kommunit tamaasa assigiimmik sulliniarsaralugit iliuuseqartarluta immikkoortitsisaratalu taamaattumik taanna nammineq taanna oqariartuutigivaat aamma taanna tunngavilersuutitut pigivaat, KANUKOKA-mi siulittaasoq oqarpoq.
