KANUKOKA: Atuarfiit pitsanngorsaleruttorpavut
Politikerit marluk oqallinnerannut atatillugu, Palle Jerimiassenip taakku piumaffigai, Nunatsinni atuarfeqarnerup pitsanngorsarneqarneranut atatillugu suleqatigiissitap sulinera utaqqimaalaaqqaartariaqaraat.
- Suliaqartut assigiinngitsut novembarip naalernerani naapisinneqartussaapput tassani qanoq alloriaqqittoqassanersoq paasisallu kingulliit suunersoq saqqummiunneqartussaapput, Palle Jerimiassen oqarpoq.
Aamma atuaruk Nivi Olsen: Atuarfeqarfiit iliuuseqarfigineqassapput
Oqallisilernerup qiterpiaa
Oqallinneq aallartippoq, ilinniartitaanermut naalakkersuisup, Nivi Olsenip Narsap atuarfiani atuartut angusaasa pitsaanngissusaasa aaqqinneqartariaqarnera piumasarereeraa, Inatsisartut ilinniartitaanermut ataatsimiititaliaani siulittaasup, Vivian Motzfeldtip naalakkersuisoq tamanna pillugu isornartorsiormagu.
Tassalu taakku oqallinnerannut KANUKOKA-p siulittaasua, Palle Jerimiassen ilanngulluni oqarpoq, oqallinneq mianersuunneqartariaqartoq oqarlunilu, Nunatsinni atuarfiit pitsanngorsarnissaat pillugit suliaqartup ataatsimiititaliap siunnersuutaat otaqqimaalaarneqartariaqartut, Palle Jerimiassen oqarpoq.
Aamma atuaruk Ataatsimiititaliap Nivi Olsen isornartorsiorpaa
Tassalu suligasuartussanik maanna sulisoqalereersoq naalakkersuisoq, Nivi Olsen ippassaq oqarpoq, ilinniartitaaneq pillugu ataatsimiititaliap siulittaasuanit, Vivian Motzfeldtimit isornartorsiorneqareerluni akissuteqarnermini. Naalakkersuisullu taama oqariartuuteqarnera, KANUKOKA-p siulittaasuata nuannaarutiginerarpaa oqarluni, Nunatsinni meeqqat atuarfiisa angusaat pitsaanerusinnaagaluartut tamassuminnga suliaqartunit assortorneqanngimmat.
- Nassuerutigissavarput, aamma tamanna nassuerutigereerparput Nunatsinni atuarfeqarfiit kivinneqartariaqartut, tassalu tamanna aallaavigalugu sulinerput ingerlallutigu. Nalunaarusiaq malillu isumaqatigiissutigisimasagut maanna suliaraagut, tassalu taakku aallaavigalugit sulinerput ingerlariaqqissalluni.
KANUKOKA-p siulittaasua, Palle Jerimiassen tamaa oqarpoq.
Atuarfiit allat paasiniarneqassapput
Pisoq pillugu ilinniartitaanermut ataatsimiititaliamit Nivi Olsen qaaqquneqarluni isumasioqatigineqarusuttoq, Vivian Motzfeldt nalunaarpoq. Atuarfiit Narsami atuarfittut ittut pitsanngortinneqarnissaannut sukumiisumik qanoq iliuuseqartoqartoqarnissa ataatsimiititaliap isumasioqatigiinnermi qulequtsiuppaa.
