Issittumi Sakkutooqarfik: Kangilinnguit ammaqqinnissaannut ernumassutissaqanngilaq
Sakkutooqarfik ammaqqinneqarpat tamanna aalisarnermut akornusersuissasoq, Arsummi nunaqarfimmi aqutsisut ernummatigalugu oqareersullu Issittumi Sakkutooqarfik taama oqarpoq.
Sakkutooqarfeqarallarmat tamanna nunap immikkoortuani aalisarnermut innuttaasunullu kinguneqarnerluttarsimanera oqaatigaat, Torben Grinderslevilli tassa maanna oqaatigaa ernumassutissaqanngitsoq:
- Ima oqaatigerusuppara: Sakkutoortatta sanilitsinnut pissuserissaanngippata tamanna soorunami akuersaarneqarsinnaanngilaq. Akuersaarneqarsinnaanngitsuliortoqarpat tamanna soorunami iliuuseqarfigiumaarparput, Grinderslev oqarpoq.
AAMMA ATUARUK Kangilinnguani sakkutooqarfik ammaqqittussanngoraat
Sakkutooqarfiusimasup ammaqqinneqarnissaani qanorpiaq iluseqassanersoq suli aalajangerneqanngilaq, sakkutuullu sulisullu qassit Kangilinnguaniitsinneqassanersut suli aamma aalajangerneqarnani, sakkutuut naalagaasa ilaata oqaatigaa.
- Kangilinnguit siunissami qanoq atorneqassanersut maanna misissorneqassaaq, suut suliassaassanersut, kikkullu sulisorineqassanersut paasiniarneqassalluni, soorlu aamma qanoq akuttutigisumik sakkutooqarfimmit aallaaveqartunik suliaqartoqartassanersoq, Torben Grinderslev oqarpoq.
AAMMA ATUARUK Forsvarsaftale mangler fokus på civiles hjælp
Suliassalli siornatigutut annertutigissanngitsut taassuma erseqqissaatigaa:
- Suliassat siusinnerusumut naleqqiullugit ikinnerussapput, taamaammat ernumassutissaqartoqanngilaq, taanna oqarpoq.
Sulisut ikittuinnaassapput, soorlu aserfallatsaaliinermik ingerlatsinermillu suliallit, umiarsuarnillu akuttunngikkaluamik aamma tikittoqartassalluni, sakkutuut naalagaasa ilaat Torbe Grinderslev oqarpoq.
