Aaja: Illersornissamut isumaqatigiissummi innuttasut ikiuusinnaanerat amigaataavoq
Illersornissamut qullersaqarfiup issittumi suliassaanut Nunatsinni innuttaasut qanoq ikiuussinnaanissaat ukkatarineqarnerusariaqarpoq.
Illersornissamut qullersaqarfiup issittumi siunissami suliassai pillugit danskit naalakkersuisuisa De Radikalep Socialdemokraatillu isumaqatigiissutigisaat pillugu Nunatsinnit folketingimut ilaasortaq Aaja Chemnitz Larsen taama isumaqarpoq.
Illersornissamut ministereqarfiup Nunatsinni kajumissutsiminnik upalungaarsimasussat kalaallinullu sakkutuunut tunngasunik tunngavigisamik ilinniagaqartitsinissaq misissueqqissaarnermini ukkatarinninnera Aaja Chemnitz Larsenimit siornatigut nersualaarneqarpoq.
AAMMA ATUARUK Kangilinnguani sakkutooqarfik ammaqqittussanngoraat
Isumaqatigiissutigineqartumili kajumissutsiminnik upalungaarsimasussanut suliaq danskit kajumissutsimik sakkutuuini misilittakkanik tunngaveqartussatut piareersaatitullu sammisassatut taaneqarpoq.
- Assersuutigalugu Islandimi Norgemilu qanoq kajumissutsiminnik upalungaarsimasoqarnersut misissoraanni taakku misilittagaat danskit kajumissutsiminnik sakkutuuisa misilittagaanniit naleqqunnerussasut qularutiginngilara. Aamma piareersaatituinnaq sammisaqarnissaq pilersaarutaavoq. Tamatuma saniatigut nammineq kajumissutsimik sulinissamut piumassuseqartitsinerulernissamik ineriartortitsinissap sivisusarnera eqqaamaneqarnissaa pingaartuusoraara, Aaja Chemnitz Larsen oqarpoq.
Nunatsinnit Savalimmiuniillu folketingimut ilaasortat isumaqatigiissut pillugu sapaatip akunnerata massuma ingerlanerani ataatsimiigiaqquneqarput. Aaja Chemnitz Larsenilu kisimiilluni Nunarput sinnerlugu ataatsimeeqataavoq.
Illersornissaq pillugu isumaqatigiissuteqartut Nunatsinnit Savalimmiuniillu maanna ilaasortaaffigineqartut isumaqatigiissuteqartuupput.
