Kangilinnguit ammaqqinnissaa Arsummi ernummatigaat
- Uagut nunaqarfimmi aqutsisuni aalajangernikuuvugut ammaqqinnissaa akerleralugu, ukua patsisigalugit tappassuma ammaqqikkuni qanoq oqartussaasuseqalernissaat, tassa naalagaavallaalernissaat nuannarinagu. Siornatigut taamaammata, Jørgen Christensen oqarpoq.
AAMMA ATUARUK Kangilinnguani sakkutooqarfik ammaqqittussanngoraat
Danskit naalakkersuisuisa Illersornissaqarfiup Issittumi siunissami suliassai pillugit Radikale Venstre Socialdemokraatillu peqatigalugit isumaqatigiissutigisimavaat. Kangilinnguit 2012-imili matosoq, ammaqqissasoq isumaqatigiissummi aamma ilaavoq.
Nunaqarfimmili aqutsisut sakkutuut nunaqarfiup eqqaani naalagaavallaarnissaat aalisarnerlu, nunaqarfimmut pingaaruteqaqisoq, killilersulissagaat ernummatigaat, nunaqarfimmi aqutsisuni siulittaaasoq, Jørgen Christensen oqarpoq.
- Tassa nunaqarfitta uummatigivaa taanna, taamaammat taanna pillugu illersorniarsarivarpoq suna tamaat tikillugu.
Ernumassutissaqanngitsorli, Arktisk Kommandomi majoori, Torben Grinderslev oqarpoq.
- Taamani Grønlandskommandogallarnitsinnit suliassagut annikinnerujussuussapput, atortugut tamaasa Nuummut nuunnikuugatsigit, taamaammat ernumassutissaqarsorinngilara, Torben Grinderslev oqarpoq.
Sakkutooqarfik orsussanik imaanilu avatangiisinik mingutsitsinermut akiuiniarnermut atortussanik inissiisarfittut atorneqassasoq isumaqatigiissummi atuarneqarsinnaavoq.
Kangilinnguilli ammaqqinnissaa qanoq kinguneqassanersoq qassinillu sulisoqassanersoq suli erseqqissarneqangilaq.
