Unnuaq politiinut misigisaqarfioqisoq: Kangianit avannamut tillinniarnerit

Nunatsinni sumiiffinni arlaqartuni tillinniat unnuap ingerlanerani ulapissimapput – avannaani kangianilu. 

Kalaallit Nunaanni Politiini pigaartut pisortaat, Preben Kleist, KNR-imut oqarpoq:

- Tasiilami katersugaasiviup igalaava pinerluuteqartumit ilisimaneqanngitsumit unnuap ingerlanerani aserorneqarsimavoq. Sumiiffimmit sumik tillittoqarsimanera pillugu nassuiaammik suli pissarsinngilagut, oqaluttuarpoq nangillunilu: 

- Pisoq inuit ilaannit tusaaneqarpoq. Pigaartorput sumiiffimmukarpoq paasillugulu tillinniartoqarsimasoq.

Tasiilamili kisimi tillinniaqarsimanngilaq. 

Kingunerlutsitsilluni tillinniaq

Avannarpasinnerusumi – Aasianni – unnuap ingerlanerani aamma tillinniaqarsimavoq.  

Pujortagussuaarlunilu matumani tillinniarsimarpasissoq takuneqarsinnaavoq.  

Tassami Aasianni Akiki unnuaq tillinniarfigineqarpoq. Taama Preben Kleist ilisimatitsivoq:

- Illup qaavata ilaa oqorsaataalu piiarlugit iikkakkut iserfissaliorsimavoq. Tassanilu cigarettit kartonit sisamat tillissimavai, oqarpoq. 

Pisiniarfimmi videokkut nakkutilliissuteqarpoq tillinniallu pujortaguttup tigusariniakkap isikkua taamaammat pigineqarluni: 

- Angutaavoq 175 centimeterit missaannik angissuseqartoq. Qernertumik kavaajaqarpoq nasaasartaalu atisimallugu. Qernertunik qarleqarpoq, qasersunik qaqortunik atungalinnik arpaateqarluni, Preben Kleist oqarpoq