Kangerlussuup nuunnissaa oqaluuserilerpaat
Isumalioqatigiissitap isumaliutissiissutaani issusuumi, inuiaqatigiit aningaasaqarnerinut suna pitsaanerpaassanersoq tunngavigalugu allanneqarsimasumi, immikkoortut annerit pingasuupput:
Isumalioqatigiissitap siullertut inassutigaa, imarpik qulaallugu timmisartunut mittarfik Kangerlussuarmiit Nuummut nuunneqassasoq. Kisianni taama aalajangiisoqartinnagu assigiinngitsunik misissuinissaq pisariaqarmat, Naalakkersuisut saqqummiussisutaat aallaavigissagaanni, ullumi oqaluuserisassat marluinnanngorput.
Siullermik: Nuummi umiarsualivik allineqassaaq.
Aamma aappaattut: Narsarsuarmi mittarfik nunap imikkoortortaani mittarfimmik Qaqortumiittussamik taarserneqassasoq.
Isumaliutisiisut apriilip aallaqqaataani saqqummiunneqarmalli, Qaqortumi mittarfiliornissamik inassut kujataani oqallinnermik sakkortuumik pilersitsisimavoq, aammali Inatsisartunut ilaasortat kujataaneersut akuliuttarsimallutik.
Tassalu asersuutigalugu Inuit Ataqatigiit politikkikkut oqaaseqartartuata, Aqqaluaq B. Egedep, oqaatiginikuuaa, Narsarsuarmi mittarfiup matuneqarnissaanik siunnersuut, nammineq akuerisinnaanagu. Taassuma partiiani siulittasoq, Kuupik Kleist, illuanik pisoqarnissaanik kissaateqarluni oqarnikuuvoq.
Kommune Kujalliup kommunalbestyrelseata oktobarip arfernani atatsimiikkami isummani naqissuserpaa. Ilaasortat 11-iusut - tassalu amerlanerussuteqarluartut - Qaqortumi mittarfeqalernissaa isumaqatigaat.
Kisianni aamma allarpasuarnik inassuteqarpoq, Inatsisartut qaquguugaluarnersoq isummerfigisassaannik. Assersuutigalugu Nerlerit Inaanni Kulusumilu mittarfiit, Illoqqortoormiuni Tasiilamilu mittarfiliornikkut taarserneqassanersut, Ilulissani mittarfik tallineqassanersoq, Qaanaamilu mittarfik matuneqassanersoq siunissami aamma isummerfigisassaapput.
Assartuussineq Pillugu Isumalioqatigiissitap inassutaani ataaseq Naalakkersuisut maannakkuugallartoq tunuartinnikuuaat. Tassalu umiarsuarnik ilaasartaatinik amigartooruteqaataasumik ingerlatsineq unitsinneqassasoq. Tassami Naalakkersuisut aalajangernikuupput, Arctic Umiaq Line amigartooruteqannginnissaanut ukiuni sisamani qularnaveeqqusiissallutik.
Inatsisartut ullumi immikkut ittumik ataatsimiissapput, Assartuussineq Pillugu Isumalioqatigiissitap isumaliutissiisutaat kisiat oqaluuserissallugu.
