Kangerlussuup ataannarnissaa takornariaqarnerup qulakkiissavaa
Kalaallit Nunaannut tikittut tassanngaluunniit aallartut amerlanerpaat inuunermik ilaani Hotel Kangerlussuaq ilisarilersimavaat.
Immaqa timmisartup tullianik utaqqineq akunnittarfiup cafeteeriaani pomfritsitornermut atorneqarsimavoq, immaqaluunniit unnuisoqartarsimavoq nunap ilaani tassani pinngortitaq kusanartorsuaq misissuataarniarlugu.
Massakkut akunnittarfik 5357 kvadratmeteritut atsigisoq malunnarluartoq 60-ikkunneersoq nutaamik piginnittoqalerpoq.
Qaammatit ikittunnguit niuffaffimmeereerluni Albatros Arctic Cirkel Aps.-ip akunnittarfik pisiaraa, taannalu siunissami ingerlatsiviup Kangerlussuarmi suliaani pingaarnerpaalissaaq.
- Kangerlussuarmi takornariaqarneq siunissamut qulakkeerniarlugu isumaqarpugut tikeraat nalissaqanngitsumik tamakkiisumik misigisaqarnissannik neqeroorfigisariaqarlugit. Akunnittarfik sammmisatsinnik katitertakkami ilaavoq, Albatros Arctic Cirkel-imi pisortaq Jørgen Larsen oqarpoq.
Albatros Arctic Cirkel-ip nunaqarfimmi pisuinnaat unnuisarfii marluk pigereerpai, Polar Lodge aamma Old Camp, aamma neriniartarfik Restaurant Roklubben. Saniatigut ullut tamaasa sermersuarmut angalatitsissarput.
Akunnittarfimmik pisinermut atatillugu ingerlatat pioreersut taamaatinneqarnissaat pilersaarutigineqanngilaq.
Takornariat Kangerlussuuup uumasui pinngortitartaalu misigissavaat
Ullumikkut aasaanerani Kangerlussuaq inoqartaqaaq. Tamannalu allanngupallassinnaavoq Nuummi Ilulissanilu mittarfiit nutaat ammarpata timmisartorsuillu nunanit allaneersut Kangerlussuarmut mittarunnaarpata.
Kisianni Jørgen Larsen-ip siunissaq nikallunganartumik isiginngilaa. Tassami qularinngilaa inuit kangerluup angisuup qinnguani nunaqarfik tikittaannassagaat.
- Ullumikkut Kangerlussuarmut pisut pingajorarterutaat ulluni arlalinni maaniittarput. Isumaqarpugut mittarfittaat ammarpata tamanna nangissasoq. Takornariat maanga pisarput uumasut, nunap pissusaa Sermersuarlu misigiumallugit, Jørgen Larsen oqaarpoq.
Naak Albatros Arctic Cirkel-ip pisortaata Kangerlussuup takornarianut ornitassaanera isumalluarfigigaluarlugu nassuerutigaa nunaqarfiup siunissaa pillugu suli paasisariagassaqaqisoq.
Taamattumik neriuutigaa politikerit tapersersussagaat nangillugu Kangerlussuarmut timmisartortoqartassasoq, aamma kangerlummi angallatit ingerlavissaat itisilerneqassasoq umiarsuit takornariartaatit umiarsualivik ulinngatillugu tininngatillugulu atorsinnaniassammassuk.
Hotel Kangerlussuaq sumiiffimmiunit pigineqartoq
Albatros Arctic Cirkel piginneqatigiiffimmit danskiusumit Albatros-imit aqunneqarpoq.
Naak danskinut atassuteqaraluarluni Albatros Arctic Cirkel Kalaallit Nunaanni angerlarsimaffeqartutut nalunaarsorneqarpoq, ingerlatsivik aamma sulisut maani akileraarutinut akiliisassallutik.
Tunisinermut atatillugu piginnittuunikut Mittarfeqarfiit pingaartissimavaat akunnittarfiup sumiiffimiunit pigineqarnissaa.
Taamaattumik Mittarfeqarfiit pisortaanerata Henrik Estrup-ip nuannaarutigaa Albatros Arctik Cirkel-ip illut tigummagit.
- Ingerlatsivik ukiorpassuarni Kangerlussuarmeereerpoq takornariaqarnermillu ineriartortitsilluni. Nuannaarutigaarput sumiiffimmiut siunissami aamma nunaqarfimmut tunniusimallutik sulissammata, Henrik Estrup oqaarpoq.
Tunisinermi akigitinneqartoq Mittarfeqarfiit oqaatigerusunngilaat, kisianni oqarlutik piserusullutik soqutiginnittut arlaliusimasut. Kisianni Albatros Arctic Cirkel kisimi neqerooruteqarsimavoq.
Aningaasaliinerit amerlanerusut takkutilerput
Naak ukiuni kingullerni Hotel Kangerlussuaq arlalitsigut pitsanngorsarneqarsimagaluartoq pilersaarutigineqarpoq akunnittarfik pitsanngorsarneqaqqissasoq.
- Cafeteeriap kusassarnissaanik pilersaaruteqarpugut. Saniatigut akunnittarfik nalinginnaasumik pitsaanngorsarneqassaaq ulllumikkumiit pitsaassusaa qaffalluni, Jørgen Larsen oqarpoq.
Kisianni imaanngilaq suna tamarmi allanngussasoq. Akunnittarfiup tiguneranut atatillugu isumaqatigiissutigineqarpoq sulisut tamarmik suliffitsik tigummiinnassagaat.
Aamma siunissami Hotel Kangerlussuaq timmisartunut ilaasut timmisartut taamaatiinnarneqarnerat pissutigalugu unittoortut unnuisinnaanissaannut qulakkeereqataassaaq.
Hotel Kangerlussuaq 61-nik initaqarpoq. Saniatigut illutaat imaqarput allaffimmik, quimik aamma pisiniarfimmik
