Kangerlussuarmi annikillisaanissaq pisortaanerup mianersoqqussutigigaa
Kangerlussuup Dash 8-mik miffigineqarsinnaasumik siunissami aamma mittarfeqarnissaa Air Greenlandimit kissaatigineqarpoq, qulimiguuliinnarnuinnaq mittarfinngortinneqarnera annertuumik kinguneqarsinnaammat.
- Kitaani timmisartuussisarnitsinni Kangerlussuaq periarfissat aappaattut miffigisinnaasatsitut ullumikkut atortupilussuuarput, taamaammat ajornartorsiutinik pilersitsisinnaavoq, Air Greenlandip pisortaanera KNR-imut oqarpoq.
AAMMA ATUARUK Narsarsuaq Kangerlussuarlu qulimiguulinnut mittarfinngortinneqarlik
Miffigineqarsinnaanissaa pisariaqartoq
Assersuutigalugu timmisartoq Nuummit angalassappat, taava timmisartortartut mittarfimmik periarfissat aappaattut miffigisinnaasaminnik angalanissaminnut pilersaarummut nalunaarsuisariaqarput, assersuutigalugu Sisimiuni missinnaanngikkunik mikkiartorfigisinnaasaminnik, aamma mittarfik tikitassartik silarluppat mittarfiit marluutittariaqartarpaat.
Timmisartortitseqatigiiffillu naapertorlugu, Kangerlussuarmi mittarfik tamatumunnga tunngatillugu ullumikkut pingaaruteqarpoq, silarlunnera pissutigalugu matusariaqartarnera qaqutigoortuummat.
Jacob Nitter Sørensen naapertorlugu ajornartorsiutinik pilersitsisinnaavoq, Kitaani mittarfiit allat periarfissat aappaattut mikkiartorfissatut nalinginnaasumik atorneqarsinnaasanngimmata.
- Mittarfik silagiffiusoq toqqartussaavat, tassalu imaakkajulluni naqitsiniisaffeqarpat imaluunniit pujorpat, taava aamma Paamiut, Nuuk, Maniitsoq, Sisimiut, Aasiaat Ilulissallu eqqugaasimasarlutik, pisortaaneq oqarpoq
AAMMA ATUARUK Kangerlussuarmi nunaqarfimmi aqutsisut Demokraatit isumaqatiginngikkaat
Ungasissuliartariaqarsinnaasut
Taamaammat Amerikamiut sakkutooqarfigisimasaat qulimiguulinnuinnaq mittarfinngortinneqassappat, taava periarfissat aappaattut mittarfimmik ungasinnerusumiittumik toqqaasoqartariaqarsinnaavoq, soorlu Kulusummi imaluunniit Canadami Iqalunni.
Taamaattoqarneratigullu timmisartut orsussaqarnerusariaqassapput tamannalu ilaasut amerlassusaannut sunniuteqarsinnaavoq.
- Ilaasut tamaasa ilaatinnissaannut timmisartoq oqimaappallaalersinnaavoq, orsussaqarnerussagaannimi ilaasut ilaat niutinneqartariaqarsinnaammata, Air Greenlandip pisortaanera oqarpoq.
