Kalaallit taekwondortartut kuultinnallutillu sølvinnattut
Kalaallit taekwondortartut ’King of Taekwondo’-mi unammiaaqataareerlutik ujaminik nassataqarlutik angerlarput.
Kalaallit taekwondomi nunanut allanut unammisartut Grækerit Nunaanni amerlasuut peqataaffigisaanni unammiuaarnerminni kuultimik sølvimillu ujaminnapput.
Lars Lennert Abelsen angutini 4. daneqartuni tul-ernermi kuultinnappoq, Angutinnguaq Nielsenilu inuusuttuaqqani 1. dan-eqartuni tul-ernermi sølvinnalluni.
Kalaallit taekwondortartut kattuffiat, Greenland Taekwon-do Federation tusagassiuutinut nalunaarummi allappoq.
Periarfissat ineriartortissinnaasat
Angusarissaarneq siunissamut neriuutissaqartitsivoq. Neriuut tamanna qaffasinnerusumik angusaqarnissamut ineriartortinneqarsinnaasoq, kattuffimmi sungiusaasoq, Louis Nielsen oqarpoq.
- Unammisartut piginnaasaat killiffiilu misiligareersimalerpagut, maluginiarlugillu suut piffissaq aggersoq ineriartortissinnaallutigit. Nalilersuereerutta unammisartut suleqatigalugit ukiut tullissaanut piareersarnissaq ingerlateqqissavarput, taamaalilluta pitsaanerpaamik aappaagu EM-imut upernaakkut Estland-mi ingerlanneqartussamut piareersarsinnaassalluta, Louis Nielsen oqarpoq.
Nunanut allanut unammisartut Elite Sport Greenlandimik taperserneqarput unamminermi peqataasut allat Inukkuluk G. Lennert Maasi Davidsenilu aamma ujaminnapput.
