Akunnerni arlaqartuni suli innaallagiaqassanngitsoq
Nuuk akunnerni arlaqartuni suli innaallagiaqanngikkallassaaq. Nukissiorfiit innaallagissiorfeeqqanik, Nuummik, Nuussuarmik, Qinngorpumillu innaallagialersuisussanik, aallartitsiniarluni maanna sulivoq. Illoqarfiup tamakkerluni innaallagiaqalernissaanut nalunaaquttap akunneri pingasuniit tallimanut ingerlasinnaapput.
Kalaallit Nunaanni politiit KNR-imut taama nalunaarput.
Innaallagiaqalernissaata tungaanut kialaarnissamik inunnillu napitaqarnissamik pisariaqartitsigaanni Nuummi Timersortarfissualiartoqarsinnaavoq. Taanna maanna kialaarfissiavoq. Kommuneqarfik Sermersooq Facebookimi quppernermini taama allappoq.
Kommunip utoqqaat illuisa kiassarnissaat sulissutigai.
Nuummi upalungaarsimasut, Dronning Ingridip napparsimmavissua Kalaallit Nunaannilu Politiit innaallagissiuteeqqaneersunik innaallagiaqarput, taakkualu oqarasuaatikkut attaveqarfigineqarsinnaassapput.
Aamma politiit biili arlaqartut aqqusinerni ingerlaarput, taamaalillutik taakkua Nuummi Nuussuarmi Qinngorpumilu takussaasinnaajumallutik.
Politiit biiliminni angalaartut pinartoqartillugu, oqarasuaatillu atorsinnaanngitsillugit, saaffigineqarsinnaapput, taavalu aamma politeeqarfiliartoqarsinnaaalluni napparsimmaviliartoqarsinnaalluniluunniit.
KNR radiokanal 90,5 aqqutigalugu nalunaaqutaq arfineq-marlunut immikkut ittumik radioaviiseqartitsissaaq.
