Timersortarfiit ulikkaanngikkaluarlugit: Taekwondomi GM internettikkut pissaaq
Taekwondortartut peqatigiiffii timersuummillu atuisut ulluni makkunani ulappupput immikkuullarissumik nuna tamakkerlugu unammisuarnissamut – internettikkut GM-rnissamut.
Unammeriaatsimi tul-imi meeqqaniit utoqqasaanut assigiinngitsunik qalipaatilinnik qiterutillit tulimi misiliinertik mobilimut immiutissavaat ITF-illu unamminermut qupperniliaanut immiullugu, tassanilu Nunarput immikkut qupperneqarpoq. Peqataasut videoliaat dommerinit novemberip arfineq aappaat nalilersorneqassaaq.
- Kattuffissuaq ITF upernaaq corona aallartimmat internettikkut unammisitsisarfimmik sanavoq. Taamanikkut uagut naluarput GM-rsinnaassanerluta taamaattumillu peqataaffiginngikkallarlugu, Kalaallit Nunaanni taekwondortartut kattuffianni siulittaasoq Vivi Gudmundsen Lennert KNR-mut nassuiaavoq.
- GM internettikkut maanna ingerlatissavarput ajugaasullun novemberip arfineq aappaanni toqqarneqassapput peqataasut videonut immiussaat dommerit isiginnaareerpatigit, Vivi Gudmundsen Lennert oqarpoq.
Taamaasioqqissinnaapput
Peqataasut tul nammineq toqqagartik ataaseq takutissavaat aammalu alla dommerit toqqariigaat takutissallugu.
- Internettikkut unammeqatigiittarfik nunat assigiinngitsut 60-it sinnillit peqataaffigaat. Unammisitsereerutta ilikkagaqarsimanissarput ilimanarpoq, Vivi Gudmundsen Lennert oqarpoq.
- Ilimanarsinnaavormi corona sivisuumik atuukkallassasoq. Taamaammat ilimanarsinnaalluarpoq unammeriaatsip taassuma siunissami atoqqissinnaanissaa, Vivi Gudmundsen Lennert naggasiivoq.
