Taekwondortartuusimasup tamatta peqqinnarnerusumik inuuneqartilissagaatigut
- Soorunami nuannaarpunga aamma tulluusimaarpunga. Pissanganarpoq aamma qilanaarpunga sulinissannut.
Nunatsinni timersornermut naalakkersuisunngortoq siulleq, Peter Olsen (IA) taama oqarpoq.
Tamatuma saniatigut ilinniartitaaneq, kultureqarneq ilageeqarnerlu aamma naalakkersuisuuffigai.
AAMMA ATUARUK Ataatsimut isigalugu: Naalakkersuisunut ilaasortat nutaat aaku
Inuit Ataqatigiit Naleqqallu naalakkersuisoqatigiinnissamik isumaqatigiissut partiinut taakkununnga ukiuni sisamani Naalakkersuisuutitsilersoq sapaatit akunnerisa marluk matuma siorna atsiorpaat. Isumaqatigiissummilu tassani aalanerulluta peqqinnerusumik inuussagut aamma allassimavoq.
Nunatsinni nunarsuarmi aalanerpaanngornissarput siunertaavoq. Tamannalu Peter Olsenip siuttuuffigissavaa.
2030-mi aalanerpaat
Nunatsinni timersortartut kattuffiata Peter Olsenip toqqarneqarnera nersualaarutigereerpaa. Timersornermummi naalakkersuisoqarnissaa taakkununnga iluatsitsineruvoq.
Taamaammat Peter Olsenip timersoqatigiiffiit kattuffii assigiinngitsut maanna suleqatigissavai. Taanna taekwondomik nunanut allanut unammisartuunikuuvoq – maannalu nunatta nunarsuarmi aalanerpaanngornissaa unammillissutigisussanngorpaa.
AAMMA ATUARUK Peter Olsen: Beslutningen gjorde ondt i hjertet
- Annertunerusumik aningaasaliissuteqarnikuuvugut ilaatigut tamakkorpiaat pillugit, soorlu nunanut allanut unammisartoqarnerup aamma nukittorsaavigineqarnissaa eqqarsaatigalugu, tassa taamaammat qilanaaraakka.
- Islandimi ilisimavarput paasivarpullu sungiusaasut aamma aningaasaliiffigineqartartut aningaasarsiaqartinneqartullu, tassa tamakkuupput soorlu arlaatigut qanoq pinerpoq siunissami aamma eqqarsaatissatut immaqalu aamma isumassarsiorfissatta ilaat.
Nunatsinni nunanut allanut unammisartunut sungiusaasut ilaat akissarsiaqartinneqartarput – tamannali tamanut atuutinngilaq.
GIF-illu naalakkersuisoqalerneq nuannaarutigaa, peqatigiiffiummi nunarsuarmi 2030-mi aalanerpaanngornissarput sulissutigaa.
- Taamaattumik qilanaaqaagut timersornermi siuttuusussamik naalakkersuisumik peqaleratta, siulittaasoq, Nuka Kleemann oqarpoq.
Borgmesteriusinnaagaluartoq
Peter Olsen Kommune Qeqertalimmi kommunalbestyrelsimut qinersinermi taaguunneqarnerpaavoq, borgmesterinngortussatullu innersuunneqaraluarluni.
Taanna kommunimut qinersinermi 442-nit taaguunneqarpoq – borgmesterimiillu Ane Hansenimit taaguunneqarnerulluni.
Taannali Inatsisartunut aamma qineqqusaarpoq, Naalakkersuisunullu isernissaminut periarfissaqarnini pissutigalugu kommunalbestyrelsimut ilaanissani unitsiinnarpaa.
Peter Olsen qinigaaffimmi kingullermi Inatsisartunut aamma ilaavoq, tassanilu Aningaasaqarnermut Akileraartarnermullu ataatsimiititaliamut ilaasortaalluni.
Qinigaaffimmi kingullermi Kommune Qeqertalimmi kommunalbestyrelsimut aamma ilaasortaavoq – tamannali Inuit Ataqatigiit qinersinermi taaguunneqarnerpaallutik naalakkersuisut allaffeqarfiinut nuunnginneranni pisimavoq.
