Kalaallit suliartunngitsuukulasut

Taamaanneralu allanngortikkusuppaat. Taamaammat allaneersunik sulisoqarnissamut akuersissummik pissarsinissaq ajornarnerulersillugu, inatsit allanngortinnneqassasoq, partiit taakkua siunnersuuteqarput.

Demokraatilli apeqqusiinerupput, namminneq isumaqaramik ajornartorsiut kalaallit suliffimmik paarsisinnaannerannut tunngasuusoq.

Ullumikkummi sulisitsisoq allamiumik sulisoqalernissamut akuersissummik kommunimut qinnuteqarsimaguni, ullullu 14-it qaangiuneranni akissutisisimanngikkuni, tamanna akuerineqarnertut isigissavaa.

Kommunit nunatsinneersunik piukkunnartunik ujarlernissaannut piffissaqalerniassammata, taama piffissaliussisimaneq qaammatinngorlugu sivitsorneqassasoq, Siumut Inuit Ataqatigiillu isumaqarput.

- Pisariaqalersimavoq takusinnaanngoratsigu nunatsinni suliffissaaleqisut ima amerlatigigaluartut nunatta avataaninngaanniit suliartortut aatsaat taama amerlatigisut takussaaleraluttuinnarmata, nunaqavissut suliffissaqarnissaat illersorniarlugu siunnersuuteqarpugut, Malik Berthelsen Siumut sinnerlugu oqarpoq.

Taamatullu oqaaseqarnera Inuit Ataqatigiinnit ilalerneqarpoq.

- Uagut qularutiginngikkaluarparput avataaniit suliartortut tikisinngikkaluarlugit ilumut Nuummi pissaqanngikkunik, taava allaat sinerissaminngaanniit pissarsisinnaagaluartut, Olga P. Berthelsen oqarpoq.

Demokraatit oqaaseqartartuata, Anda Uldumip ilimaginngilaa, siunnersuut piviusunngortinneqarpat, tamanna suliffeqarfiit tunisassiorsinnaanerannut unammillersinaanerannut malunniutissasoq.

- Inatsisip sukaterneqarnissaa qanoq pisariaqartiginersoq uagut inuussutissarsiornermut ataatsimiititaliamut nassiutissallugu misissorneqarnissaalu kissaatigalugu Inatsisartut ataatsimiittarfianni oqaatigaarput. Qanoq sunniuteqartigisinnaanera uagut aappaatigooqartikkatsigu, taamaammat sulisitsisut taavalu sulisartut kattuffii tusarniarneqassasut tassani pisariaqartikkatsigu tassa piviusunik aallaaveqarluta qanoq sunniuteqarsinnaanersoq paaserusukkatsigu, Anda Uldum oqarpoq.

Inatsisissatut siunnersuutip aappassaaneerlugu suliarineqarnissaa ukiamut kinguartinneqarpoq, kommunit suliffeqarnermilu illuatungeriit tusarniaavigineqarnissaat Naalakkersuisut kissaatigimmassuk.