Kalaallit sisorarnermi ujaminnattut
Kalaallit sisorartartut arlallit sisoraatinik oqilaniunnermi Danmarkimi pissartanngorniuttuni peqataaqqammerput Norgemi illoqarfimmi Kvitaavatnimi arlalinnik kultinnallutik.
Qeqertarsuatsiarmiut QUP-imeersut arlalinnik kultinnapput niviarsissat 13-14-inik ukiullit unammineranni Bebiane Møller Noahsen aamma Bebiane Nathansen angusarissaarlutik. Niviarsissat taakku ilaatigut marlukkaarluni iligiiaarnermi pissartanngorput. Niclas Berglund QUPimeersoq aamma marlunnik kultinnappoq.
Inuusuttuaqqalli unammineranni peqataasut amerlanngillat. Taakku unammineri taaneqartarput kattuffiup unammersuarnerinik Danmarkimi pissartartut taamaallaat taaneqarsinnaapput inersimanerusut.
NSP Nuummeersoq sinnerlugu unammipput nukappiaqqat suliniut MATU-meersut taakkulu unamminerni arlalinni unammisaqaratik qularnaatsunik ujaminnattarput.
Nukappiaqqat suliniut MATU-meersut katillugit qulingiluanik ujaminnapput taakkunani Lars Samo Tobiassen pissarsilluartortaalluni kattuffimmi arlaleriarluni pissartanngorami. Aamma marlukkaarluni iligiiaarnermi Niclas Berglund kultinnaqatigaa unammisaqaratik tassani kultinnallutik.
Isumaginninnermut naalakkersuisup Maliina Abelsenip nukappiaqqat suliniut MATU-meersut Nuummi neriniartarfimmut Sarfalimmut ullup qeqqasioriartippai ataasinngorneq februaarip arfineq aappaat angusarissaarnerannik nersorniarlugit.
Nukappiaqqat suliniut MATU-meersut maanna piareersarput nunatsinni pissartanngorniunnerit Ilulissani ingerlanneqarnissaannut aammalu Arctic Circle Racep ingerlanneqarnissaanut. Siornatigut arlaleriarlutik pissartanngorniunnerni peqataasareerput.
