Kalaallit Røde Korsiat 50.000 koruuninik ikiorsiivoq

Kalaallit Røde Korsialli qimaasut ikiorsiiviginiarlugit maanna aningaasaliiniarpoq, 50.000 koruuninillu tunissuteqarluni.

- Massakkorpiaq tamatta ilisimavarput nunarsuaq tamakkerlugu qimarngusorpassuit akornanni paatsiveerusimaarnersuaqartoq ajunaarnersuartut taaneqarsinnaasumik. Inuit 59 millionit sorsuffinnit, kaannersuaqarfinnit pinngortitarsuullu aseruuffianiit qimarngusorpassuupput. Massakkorpiaq illersorneqarnissamik tunngaviatigullu pisariaqartitatigut qimarngunerminni ikiorneqarnissaminnik pisariaqartitsisorpasuupput, Kalaallit Røde Korsiat tusagassiuutinut nalunaarummi ilaatigut taama allaaserisaqarpoq.

Kalaallit Nunaata qimaasut pillugit nammineq sooq suliniuteqannginnersoq, erinarsortartup Nina Kreutzmann Jørgensenip apeqqutigaa:

- Kalaallit Nunaat qanoq iliorpa? Nina Kreutzmann Jørgensen, Sermitsiaq.AG-mi aperivoq, nangillunilu:

- Ajornartorsiut pillugu Kalaallit Nunaannit qisuariaateqartoqannginnera pakatsissutigaara. Namminersulivinnissarput kissaatigaarput, qimaasulli ajornartorsiutaanerat pillugit qisuariaateqarata. Qimaasunik Nunatsinnut tikilluaqqusisinnaanissarpulluunniit oqallisiginngilarput, erinarsortartoq Nina Kreutzmann Jørgensen, Sermitsiaq.AG-mut taama oqarpoq.