Kalaallit peqatigiiffisa kattuffiat Inuit Danmarkimi oqaatsinik ilinniartitsinissamik sulissuteqarpoq
Danmarkimut nuukkaanni isumaqanngilaq qallunaatut oqalussinnaalersartut. Kalaallit peqatigiiffiisa kattuffianni Inuit-mi allatsi, Ulla Nielsen oqarpoq.
- Kalaallit Nunaanni qallunaatut oqalussinnaanerinnaagaluartoq ulluinnarni oqaaserilertarpaat. Pisortaqarfinnut assigiinngitsunut saaffiginnissagaanni, meeqqat atuarfinniissappata, assigisaanilu ajornartorsiutaalersarpoq. Qallunaatut ilikkarnissaq pingaaruteqartorujussuuvoq, Ulla Nielsen oqarpoq.
Taamaattumik kalaallit peqatigiiffiisa kattuffiat qallunaatut ilinniartitsinissamik aallartitsinissamik sulissuteqarpoq.
Aamma atuaruk Danskit ministeria akuunerulersitsinissamut siunnersuummut qulartoq
Kalaallit qallunaatut innuttaassuseqarmata qallunaatut nunasisunik pikkorissartitsinernut peqataasinnaatitaaneq ajorput.
Ilaqutariinnullu ingammik meerartalinnut kalaallisut oqaatsit atuinnarnissaat pingaaruteqarmat kalaallisut aamma ilinniartitsisoqartariaqaraluarpoq.
- Kalaallisut ilinniartitsisarnissap ilaatinneranut peqqut alla tassaavoq Kalaallit Nunaanni suli ilaqutaqarneq. Immaqalu Kalaallit Nunaannut uteqqissamaarneq, taamaattumillu kalaallisoorsinnaanerup attatiinnarnissaa pingaaruteqarpoq, Ulla Nielsen oqarpoq.
Aamma atuaruk Aaja: Kalaallit akuunerulersinnissaannut suleriaasissamik pisariaqartitsisoqarpoq
Illoqarfinni minnerni ilinniartitsinerit
Kalaallit peqatigiiffiisa kattuffiat maanna qallunaatut, kalaallisut kulturimillu paasinnissinnaanissamut ilinniartitsinissanut aningaasarsiorpoq, Danmarkimi illoqarfiit minnerni unnukkut atuartitsinerni tamakku ingerlanneqarnissaat takorloorneqarput.
Kalaallit Danmarkimiittut pingasuugaangata marluk illoqarfinni minnerni najugaqartarput, taamaattumillu Kalaallit Illuutaannut ungasissuniittarlutik.
- Kalaallit Danmarkimi najugallit pingajorarterutaasa marluk sinnerlugit Kalaallit Illuutaannit ungasissumi najugaqarput, taamaattumillu 2-300 kilometerisut isorartutigisumik ualikkut unnukkulluunniit ilinniariarlutik angalasinnaanngillat. Taamaattumillu illoqarfiit anginerit avataanni ilinniartitserusuppugut, ilinniariarlutik isorartuumik angalannginnissaat anguniarlugu, Ulla Nielsen oqarpoq.
Aamma atuaruk Seeberg: Kalaallit Nunaat danskit atuarfiini ilinniartitsissutigineqartalerli
Kalaallit Illuutaanni ilinniartitsiniarnerit iluatsippallaanngitsut
Kalaallilli Illuutaanni ukiuni arlalinni kalaallisut qallunaatullu atuartitsiniartarsimagaluarput. Amerlanertigullu ikittuinnarnik ilinniartoqartarluni. Aalborgimilu ukiaq qallunaatut ilinniarlutik aallartittut unikaasimapput.
Kalaallit peqatigiiffiisa kattuffianni Inuit-mi allatsip, Ulla Nielsenip, isumassarsiaq qularinngilaa.
- Kalaallit amerlasuut illoqarfiit annerniinngitsut kiserliortarput. Taakkulu ilinniartilersinnaagaanni Danmarkimi kalaallit akuunerulersinneqarsinnaasoraagut, KNR-imut oqarpoq.
Aamma atuaruk Kalaallit nuuttartut attavigineqapallattarnissaat pisariaqarpoq
Kalaallit peqatigiiffiisa kattuffiat Inuit neriuppoq ukiarumit oqaatsinik pikkorissartitsilersinnaassallutik, aningaasanik pissarsissagunik.
