Danskit ministeria akuunerulersitsinissamut siunnersuummut qulartoq
Taanna isumaqarpoq siunnersuut siornatigut takusimasamut assingusoq.
- Isumaqarpunga suliaq una pappialalersuuteqqittariaqanngitsoq. Ukiut ingerlanerini nalunaarusiat imaanginnavissimapput. Suliassamut tunngatillugu suliat tigussaasut naammassineqarnissaannut maannakkut tunngavissaqarluarpugut. Tassaapput tamakku iluatsilluarnissaat uanga ministeritut soqutiginerpaasakka.
Aamma atuaruk Aaja: Kalaallit akuunerulersinnissaannut suleriaasissamik pisariaqartitsisoqarpoq
Aaja Chemnitz Larsen, Inuit Ataqatigiinneersoq naapertorlugu, iliuusissaq kalaallinut Danmarkimiittunut tamanut - aamma ilaqutariinnut ingerlalluartunut - atukkatigut pitsanngorsaataassasoq.
Assersuutigalugu kalaallisut qallunaatullu ilinniarnissamut periarfissinneqarnikkut, oqalutseqarnerup tungaatigut pitsanngorsaaffigineqarluni, peqatigiiffiillu kalaallinik Danmarkimiittunik aallussisut naalagaaffimmit aningaasaliiffigineqartarnissaat.
Kommunit pinngitsaalillugit suliakkersussanngillat
Isumaginninnermut ministeri isumaqarpoq, kalaallit Danmarkimiittut inuiaqatigiinnut akulerutsilluarnissaat anguniarlugu kommuunit imminnit ilinniarfigeqatigiissinnaasut.
Aamma atuaruk Kalaallit nuuttartut attavigineqapallattarnissaat pisariaqarpoq
Imaanngilarli kommuunit pinngitsaalillugit suliakkersussagigut.
- Taava kommuunit ataasiakkat suliassatigut malitassaannik sullittariaqassavagut. Danmarkimi kommuunit namminersortuupput, tamannalu aamma sernissorpara, Ellemann oqarpoq.
Ministeri tigussaasumik siunnersuuteqarnikuunngilaq
Taamannalli isiginneriaaseqarneq Aaja Chemnitz Larsenip paasisinnaanngilaa. Nuna tamakkerlugu periusissamut siunnersuuteqarnermini pappialarsornerinnaq pinnagu timitaliilluni iliuuseqarnissamut siunnersuuteqarpoq.
Politikerip Inuit Ataqatigiinneersup taakkartorpaa isumaginninnermut nunamullu imminermut ministerip nammineerluni kalaallit Danmarkimiittut akuunerulersitsinissamut tigussaasumik siunnersuuteqarsimanngitsoq.
- Isumaginninnermut ministerimit tigussaasumik siunnersuummik takusimanngilanga. Maannalu suliat ingerlasut qaangiutilermata qanoq iliortoqarnissaanut aalajangertariaqalerpugut. Danskit inuiaqatigiianni eqimattat (kalaallit Danmarkimiittut, aaqq.) taakku amerligaluttuinnarput, Aaja Chemnitz Larsen oqarpoq.
